April 13, 2021, Tuesday
३१ चैत्र २०७७, मंगलवार

चाडवाडमा विदेश घुम्ने नेपाली बढ्दा मुद्रा सञ्चितिमै धक्का

चाडवाडमा विदेश घुम्ने नेपाली बढ्दा मुद्रा सञ्चितिमै धक्का

नेपाली चाडपर्वलाई आधार बनाएर विदेश घुम्न जाने क्रम क्रमिक रुपले बढ्दैछ । घुमघाम गर्नु पर्छ भन्ने जनचेतना बढदै जानु अनी सुलभ दरमा विदेश घुम्न पाउँनुले पनि नेपालीको विदेश मोह बढेर गएको छ ।
विदेश घुम्ने मोह, आकर्षक सस्तो र सजिलो टुर प्याकेजका कारण धेरै नेपाली चाडवाढमा विदेश घुम्न जाने गरेका छन् । अरू बेलाभन्दा लामो छुट्टी हुने तथा चाडबाड मनाउने शैलीमा आएको परिवर्तनका कारण नेपाली दशैँ, तिहार पारेर विदेश घुम्न जाने चलन बढ्दै छ । इन्टरनेटको बढ्दो पहुँचका कारण नजिकिँदै गएको बाह्य संसारका साथै विदेश जान सहज र सुलभ हुँदै गएको अवस्थाका कारण नेपालीहरू विभिन्न गन्तव्य जाने क्रम बढेको छ ।
पहिलो पटक जाने यात्रुहरूको रोजाइमा थाइल्यान्ड, सिङ्गापुर, मलेसिया, दुबईजस्ता मुलुक आम नेपालीको रोजाइ बन्दै गएको छ । दोस्रो पटक जानेले चीन लगायतका मुलुक छान्ने र त्यसपछि युरोपतीरको रोजाइ आम नेपालीमा परेको छ ।
सामान्य अवस्थाको तुलनामा दशैँ र तिहारका बेला विदेश यात्रा गर्नेको सङ्ख्या करिब २० देखि २५ प्रतिशतले बढ्ने र यो वर्ष पनि त्यही अवस्था रहेको छ । थाइल्यान्डमा मात्रै वार्षिक करिब ४० हजार सर्वसाधारण घुमघाम गर्नका लागि जाने गरेको नेपाल ट्रार्भल एण्ड टुर्र एशोसियसन (नाटा) को दावी छ । दशैं र तिहारमा मात्र झण्डै २ लाख ३० हजारको हाराहारीमा नेपाली विदेश घुम्न गएका छन् ।
आधिकारिक तथ्याङक बाहेक सङ्गठित रूपमा वा टुर अपरेटरसँग समन्वय नगरिनै विदेश जानेहरूको सख्या पनि बढ्दो छ । त्यसबाहेक विभिन्न व्यावसायिक घराना तथा निजी क्षेत्रका रोजगारदाताले समेत आफ्ना कर्मचारी एवं ग्राहकलाई दशैंलाई आधार मानेर विदेश घुमाउन लाने गरेका छन् ।
विदेशमा नेपालीहरूले गर्ने खर्चको अनुपात बढ्दै गएका कारण २५०० अमेरिकी डलरसम्म साट्न पाउने गरी तोकिएको सीमा घटाएर १५०० अमेरिकी डलर बनाइएको छ । नेपालीहरूले भारी सख्यामा डलर लगायत अन्य विदेशी मुद्रा साट्ने र त्यो विदेशमा खर्च गर्दा मुलुकको विदेशी मुद्रा सञ्चितिमा प्रतिकूल असर पर्ने गरेको छ ।