April 13, 2021, Tuesday
३१ चैत्र २०७७, मंगलवार

एनआरएनए सम्मेलनको लागि १५ सय प्रतिनिधि काठमाडौंमा

एनआरएनए सम्मेलनको लागि १५ सय प्रतिनिधि काठमाडौंमा

गैरआवासीय नेपाली संघ (एनआरएनए)को नवौं विश्व सम्मेलन तथा अन्तर्राष्ट्रिय महाधिबेशन मंगलबारदेखि काठमाडौंको होटल हायातमा हुँदैछ । तीन दिन सम्म चल्ने सम्मेलनले नयाँ नेतृत्वसमेत चयन गर्दैछ ।

‘म, मेरो, एनआरएनए र मेरो नेपाल’ भन्ने नारासहित हुने सम्मेलनको तयारी अन्तिम चरणमा पुगेको महासचिव बद्री केसीले सोमबार पत्रकार सम्मेलनमा जानकारी दिए । उनका अनुसार विभिन्न देशबाट १५ सय प्रतिनिधि काठमाडौं आइसकेको र १३ सय जनाले नामसमेत दर्ता गरिसकेका छन् ।

नाम दर्ता सोमबार ३ बजेसम्म र वैकल्पिक प्रतिनिधिको साँझ ७ बजेसम्म नाम दर्ता गरिनेछ । एनआरएनको नयाँ नेतृत्वका लागि विभिन्न १४ पदका लागि ४२ जना चुनिने छन् ।

एनआरएनएको आगामी नेतृत्वका लागि अध्यक्षमा उपाध्यक्षद्वय कुमार पन्त र कुल आचार्यले उम्मेदवारी घोषणा गरेका छन् । अन्य पदमा पनि उम्मेदवारी घोषणा गर्ने धेरै छन् । चुनावी माहोल भएकाले एनआरएनहरु यतिवेला नेतृत्व कसरी आफ्नो पक्षमा पार्ने भन्ने चटारोमा छन् ।

नेपाल सरकार, नेपाल उद्योग वाणिज्य महासंघ र एनआरएनएको संयुक्त आयोजनामा हुने सम्मेलनको उद्घाटन राष्ट्रपति विद्यादेवी भण्डारीले र समापन प्रधानमन्त्री केपी शर्मा ओलीले गर्ने जानकारी आयोजकले दिएका छन् ।

सम्मेलनमा प्रतिनिधिसहित नेपाल र ८१ राष्ट्रबाट २५ सय जना सहभागी हुने एनआरएनको भनाई छ ।