May 14, 2021, Friday
३१ बैशाख २०७८, शुक्रबार

गढीमाई मेलामा भक्तजनहरुको भिड बढ्दै, यो पटक करोड पुग्ने अनुमान

गढीमाई मेलामा भक्तजनहरुको भिड बढ्दै, यो पटक करोड पुग्ने अनुमान

१७ मंसिर, २०७६, काठमाण्डौ । करिब २६५ वर्षको लामो इतिहास बोकेको गढीमाई देवीको स्थापना बारा सिम्रौनगढका तिरहुतेहरूको शासनकालमा भएको मानिन्छ । सर्वाधिक पशु बलि दिइने मेलाका रुपमा परिचित बाराको गढीमाई मेलामा झूण्डका झुण्ड भक्तजनहरु मेला भर्न त्यहाँ पुग्न थालेका छन् । मंसिर १ गतेबाट सुरु भएको मेला एकमहिना सम्म चल्नेछ । हरेक पाँच वर्षमा लाग्ने मेलाको आकर्षण गढीमाईमा देख्न सकिन्छ ।


कडा तान्त्रिक र धार्मिक विधिबाट मानव रगत सहितको पञ्चबलिपछि गढिमाईमा बलि भाकल लिएर आउनेहरूका लागि बलि खुल्ला गरिन्छ । देवीलाई दिइने पञ्च बलिमध्ये सेतो २ मुसा पुजारीहरूको समूहले १७ गते वनमा गई तान्त्रीक पूजा गरिसकेपछि मुसा आफैं भेटिने र उक्त मुसासहित रातको २ बजेदेखि पूजा प्रारम्भ गरी बोका, लोकल कुखुरा भाले, सुँगुर, परेवा र मानव रगत ५ थोपा बलि दिएपछि यज्ञमा राखिएको दियो आफै प्रज्वलित हुने गर्छ ।

दियो प्रज्वलित भएपछि लगत्तैै हाँसको ५ वटा अण्डा बलि दिई अण्डामै त्रिशूल गाडिन्छ । अनि ५ वटा राँगा मन्दिरकै मौलामा बलि गरेपछि बलि सबैका लागि खुल्ला हुने प्रचलन रहिआएको छ ।
गढीमाई पञ्चवर्षिय मेलामा मंगलबार बिहानैदेखि रांगाको बलि दिने कार्य शुरु गरिएको छ । राँगा बलि दिनुभन्दा पहिला सोमबार राति १२ बजे देखि गढीमाईको पुजारीहरुले तान्त्रिक बिधि अनुसार मंगलबार बिहान ७ बजेसम्म पुजा गरेर पञ्चबलि दिएका छन् । पञ्चवलिको रुपमा मुसा, बोका, पाठी, परेवा, हासको अण्डा गरि पाँच जिवलाई बलि दिने चलन छ ।

विगतका मेलामा करिब ८० लाख भक्तजन आउने गरेका थिए । यस पटक करोड पुग्ने समितिको अनुमान छ ।
भोली १८ गते बोकाको बलि दिने कार्यक्रम रहेको छ । मेलामा पशु बलि दिदा मनोकांक्षा पूरा हुने धार्मिक विश्वास छ । मेलामा भाकल गरेका राँगाहरू बलिपश्चात त्यही छोडेर जाने र उक्त मासु केही समुदायले प्रसादको रुपमा घर लैजाने चलन रहेको छ ।


बारा, बरियारपुरकी गढी माईलाई साक्षात् देवी मानिन्छ । यिनले इच्छा पूरा गर्दछिन् भन्ने जनविश्वास रहेको छ ।
गढीमाईसँग भाकल पुरा भएपछि धेरै श्रद्धालुहरुले राँगा दिने गरे पनि त्यसलाई रोक्नुपर्छ भनी केहीले माग गरेपछि यस क्षेत्रमा त्यसको बिरोध समेत शुरु भएको छ ।