June 20, 2021, Sunday
६ असार २०७८, आईतवार

भ्रमणवर्षलाई सफल बनाउन मन्त्रीको ३१ देशका राजदुतसित आग्रह

भ्रमणवर्षलाई सफल बनाउन मन्त्रीको ३१ देशका राजदुतसित आग्रह

बुधवार १८ मंसिर२०७६, काठमाडौं
संस्कृति, पर्यटन तथा नागरिक उड्डयनमन्त्री योगेश भट्टराईले नेपाल भ्रमण वर्ष (२०२०) लाई सफल पार्न आवश्यक सहयोग गरिदिनका लागि नेपालस्थित ३१ देशका राजदूत र पाँच वटा वैदेशिक साझेदार संस्थाका प्रमुखहरूलाई आग्रह गरेका छन् । मन्त्री भट्टराईले राजदूत र वैदशिक साझेदार संस्थाका प्रमुखहरूलाई बुधबार मन्त्रालयमै आमन्त्रण गरेर भने भ्रमण बर्ष सफल बनाउन अनुरोध गरेका हुन् । भ्रमण वर्ष (२०२०) सफल पार्नमा नेपालस्थित राजदूतहरूको सहयोग महत्वपूर्ण हुन भन्दै मन्त्री भट्टराईले भ्रमण वर्षको बारेमा विश्वभरि सूचना तथा सन्देश प्रवाहका लागि अनुरोध गरे । ‘नेपाल भ्रमण वर्ष (२०२०) को विषयमा यहाँहरूका देशमा सकेसम्म बढी सन्देश प्रवाह गरी आफ्ना नागरिक पठाइदिनका लागि अनुरोध गरेका हुन् । मन्त्री भट्टराईले अहिल विदेशी पर्यटकहरूले नेपालमा प्रतिदिन ४४ डलर खर्च गरिरहेको उल्लेख गर्दै अब ८० डलर खर्च गराउने र वार्षिक ३५ लाख पर्यटक नेपालमा भित्र्याउने लक्ष्य राखिएको जानकारी दिए । उनले आगामी २०२० मा गौतम बुद्ध अन्तराष्ट्रिय विमानस्थल र २०२१ मा पोखरा अन्तराष्ट्रिय विमानस्थल सञ्चालनमा ल्याउने जानकारी दिए । त्यस्तै निजगढ अन्तराष्ट्रिय विमानस्थलको पनि प्रारिम्भक काम सकिएको र लगानीको आवश्यक मोडलको विषयमा लगानी बोर्डले काम गरिरहेको जानकारी दिए

उनले नेपाल २०७२ सालको महाभूकम्पले गरेका असर र प्रभावको पीडाबाट विस्तारै देश माथि उठेको बताएका छन् । मन्त्री भट्टराईले महाभुकम्पबाट भत्किएका नेपालका ८ सय ९१ सम्पदामध्ये ३ सय ८७ को निर्माण सम्पन्न भएको र बाँकी निर्माणको क्रममा रहेका जानकारी दिएका छन् । बाँकी दुई वर्षमा भत्किएका सबै सम्पदाहरूको निर्माण सम्पन्न गरिने लक्ष्य रहेको भन्दै साथ र सहयोगको आह्वान गरे। उनले अब आर्थिक र सामाजिक क्षेत्रको असमानतालाई अन्त्य गर्दै राष्ट्रिय पुँजीको विकास गरेर समतामूलक समाज निर्माणको बाटोमा देशलाई अघि बढाइने बताए । उनले अहिले पर्यटनबाट नेपालको कुल ग्राहस्थ उत्पादनमा ३ प्रतिशत योगदान रहेको जानकारी दिदै १५ औं पञ्चवर्षीय योजना सम्पन्न हुँदासम्म १० प्रतिशत योगदान गर्ने लक्ष्य रहेको बताए ।