April 13, 2021, Tuesday
३१ चैत्र २०७७, मंगलवार

बैंकका सिइओ सम्पत्ति शुद्धीकरणको अनुसन्धान घेरामा

बैंकका सिइओ सम्पत्ति शुद्धीकरणको अनुसन्धान घेरामा

मंसिर २५, काठमाडौं
सम्पत्ति शुद्धीकरण अनुसन्धान विभागले एक दर्जन वाणिज्य बैंकका प्रमुख कार्यकारी अधिकृत (सिइओ) माथि एकैपटक अनुसन्धान अघि बढाएको छ । बैंक तथा वित्तीय संस्थाबाट कर्जा प्रवाह गर्दा अनियमितिता गर्ने र गलत तरिकाबाट लाभ उठाउने गरेको गुनासो आएपछि विभागले बैंक तथा वित्तीय क्षेत्रमा सिइओलाई विशेष निगरानीमा राख्दै बिशेष निगरानी राखेको हो । यसरी निगरानीमा पर्नेमा बैंकमा ख्याति कमाएका अनुभाबी बैंकर्स रहेको शुद्धीकरण विभाग सम्बद्ध कर्मचारीले बताएका छन् । सम्पूर्ण वाणिज्य बैंकका प्रमुखमाथि सामान्य अनुसन्धान थालेको विभागले विशेष निगरानीमा भने एक दर्जन सिइओलाई तारगेट गरेका स्रोतले दाबी गरेको छ । विभागलाई प्रधानमन्त्री तथा मन्त्रिपरिषद कार्यालयमातहत ल्याइएपछि यसले सक्रियता बढाउँदै लगिएको छ । यसका अलावा बैंंक तथा वित्तीय संस्थाका प्रमुखहरुको सम्पत्तीमा अस्वाभाविक वृद्धि देखिएपछि पनि अनुसन्धान अघि बढाइएको स्रोतको दावी छ । बैंक तथा वित्तीय संस्थाका प्रमुख कार्यकारी अधिकृतको तलबमाथि अर्थमन्त्री डा युवराज खतिवडाले पनि असन्तुष्टि जनाउँदै आएका थिए । उनी समेत बित्तीय क्षेत्रका पदाधिकारी विशेष गरी सिइओलाई निगरानीमा राख्नु पर्नेमा जोड दिदै आएका छन् । त्यही भएर पनि अनुसन्धान विभाग अगाडि बढेको हो । अनुसन्धानको लागि विभागले बैंक तथा वित्तीय संस्थाबाट सम्पत्ति शुद्धीकरणको दृष्टिकोणमा जोखिमयुक्त क्षेत्र र ऋण प्रवाह भइसकेको क्षेत्रको डाटा यस अगाडि नै लिएको छ । यस अन्र्तगत सम्पूर्ण बैंकका कर्जा शाखामा काम गर्ने उच्च अधिकृतहरु र सिइओको विवरण यस अगाडि नै संकलन गरेको हो । यतिखेर त्यस मध्ये विशेष आर्थिक हैसिय देखिएका र समाजमा आलोचितलाई भने शुद्धीकरणले तारगेट गरेको स्रोत बताउँछ । नेपालमा सम्पत्ति शुद्धीकरणका लागि जोखिमपूर्ण मानिएको घरजग्गामा बैंक तथा वित्तीय संस्थाहरुबाट अधिक ऋण प्रवाह भएको र त्यस्तो ऋण प्रवाह गर्दा जोखिमको उपयुक्त मूल्यांकन नभएको विभागको आशंका छ । कर्जा प्रवाह गर्दा गलत मनसाय राखेर आर्थिक फाइदा लिएको देखि लिएर संस्थागत सुशासन समेतमाथि प्रश्न उठाउदै अनुसन्धान अगाडि बढाइएको हो । नेपालमा गैरकानुनी सम्पत्तीको उपयोगबाट गलत क्रियाकलाप हुन रोक्ने महत्वपूर्ण जिम्मेवारी पाएको विभागले त्यसअघि नै केही महत्वपूर्ण क्षेत्रमा अनुसन्धान अघि बढाएको हो ।