May 13, 2021, Thursday
३० बैशाख २०७८, बिहीबार

इतिहास रचेको सेयर बजारमा ११ अर्ब २० करोड माथिको कारोवार

इतिहास रचेको सेयर बजारमा ११ अर्ब २० करोड माथिको कारोवार

फागुन ०९, काठमाडौं ।
एक महिनामा पुँजी बजार मापक नेप्से १३७.०९अङ्कले बढेको छ । नेप्से बढेर १४३४.५७ अङ्कमा पुगेको हो । गत महिनाको माघ ९ गते १२९७.४८ अङ्कमा रहेको नेप्से निरन्तर बढेर १४३४.५७ अङ्कमा पुगेको हो ।
नेप्सेसँगै कारोबार रकमले पनि इतिहास रचेको छ । यो साता ११ अर्ब २० करोड ५४ लाख ६४ हजारभन्दा बढीको सेयर किनबेच हुन पुग्यो । कारोबार रकममा आएको सुधारले पनि सेयर बजारमा उत्साह थपेको छ । गत साता ६ अर्ब ६९ करोड ८३ लाख २७ हजार रुपैयाँ बराबरको सेयर कारोबार हुन पुगेको थियो । कारोबार रकममा आएको सुधारसँगै एक महिनादेखि सेयर बजार उकालो लागेपछि लगानीकर्तामा उत्साह छाएको छ । नेप्से अझै बढ्ने अपेक्षा उनीहरूले गरेका छन् ।
गत कात्तिक २० गतेदेखि अनलाइन कारोबार सुरु भएकाले पनि लगानीकर्तालाई सेयर खरिद(बिक्री गर्न सहज भएको नेप्सेको भनाइ छ । बिहीबार भएको कूल कारोबारमध्ये ३३ प्रतिशत सेयर खरिद बिक्री अनलाइनबाट नै भएको हो । साताको अन्तिम कारोबारका दिन हिजो बिहीबार एकै दिन २ अर्ब ७८ करोड ५० लाख ४ हजार रुपैयाँ बराबरको सेयर कारोबार भएको थियो । साताको पहिलो दिन आइतबार नेप्से १९.६३ अङ्कले बढेर १३६३.९७ अङ्कमा पुगेको थियो । सोमबार आइतबार भन्दा बढी अर्थात ३४.२६ अङ्कले बढेर १३९८.२४ अङ्कमा पुगेको थियो । साताको तेस्रो दिन मङ्गलबार पनि नेप्से १.७७ अङ्कले बढेर १४००.०१ अङ्कमा पुगेको थियो । साताको चौथो दिन बुधबार पनि नेप्से ५.२४ अङ्कले उकालो लाग्न पुग्यो । उक्त दिन नेप्से बढेर १४०५.२५ अङ्कमा पुग्यो । साताको अन्तिम कारोबार दिन बिहीबार पुनः नेप्से २९.३२ अङ्कले १४३४.५७ अङ्कमा पुगेको छ । साता शिवम् सिमेन्टको सेयरको माग बढी हुन पुग्यो। साताभर शिवम् सिमेन्टको सेयर बढी किनबेच भएको छ । यो साता हिमालयन डिस्टिलरीको सेयरको माग पनि अत्याधिक भएको छ । उक्त कम्पनीको बढी रकमको सेयर किनबेच भएको छ । बैंक, वित्त कम्पनीबाहेकका अरू सूचीकृत कम्पनीले पुस मसान्तसम्मको वित्तीय विवरण सार्वजनिक गरिरहेका छन् । ती कम्पनीले पनि नाफा बढाएकाले पनि लगानीकर्ता उत्साहित हुन पुगेका हुन् ।