May 14, 2021, Friday
३१ बैशाख २०७८, शुक्रबार

कोरोना संक्रमण समुदायमा फैलिएको आशंकामा रौतहटका दुई नगरपालिका सिल

कोरोना संक्रमण समुदायमा फैलिएको आशंकामा रौतहटका दुई नगरपालिका सिल

जिल्ला प्रशासन कार्यालय रौतहटले दुई नगरपालिका सिल गरेको छ । वडा अध्यक्ष र अन्य नगरपालिकाका कर्मचारी देखि केही ब्यापारीमा समेत कोरोना संक्रमण देखिएपछि बौधीमाई र ईशनाथ नगरपालिका सिल गरिएको हो । संक्रमण न्यूनिकरणका लागि एक नगरपालिकाबाट अर्कोमा जान प्रतिबन्ध लगाइएको होे । जोखिम कम गर्न प्रशासनले कार्यालय बन्द र मानिसको आवत जावतमा रोक लगाएको हो ।


प्रशासनले जरुरी सूचना जारी गर्दै दुबै नगरपालीकामा लकडाउनमा कडाई गर्ने जनाएको छ । बौधीमाईको वडा नम्बर ७ र ८ का वडाका अध्यक्षहरुमा कोरोना संक्रमण देखिएकाले अर्को सूचना जारी नभएसम्मका लागि दुबै वडा सिल गरिएको हो । दुबै नगरपालिकाको अत्यावस्यक बाहेक अन्य काम बन्द गर्न प्रशासनले निर्देशन दिएको छ ।

शनिबार इशनाथ नगरपालिका ३ का दुई पुरुषमा कोरोना संक्रमण पुष्टि भएको थियो । संक्रमित ३० वर्षीय जिल्लाको बौधीमाई नगरपालिकास्थित बंकुल बजारका व्यापारी हुन् ।

अर्का संक्रमित ईशनाथ ३ का २५ वर्षीय पुरुष हुन् । उनी वडाध्यक्षका सवारी चालक हुन् । संक्रमितहरुलाई गौरीशंकर यादव क्याम्पसमा रहेको आइसोलेसनमा राखिएको छ ।

अहिले सम्म क्वारेन्टिन बसेकाहरुमा मात्र संक्रमण देखिएको थियो । पछिल्लो समय समुदायमा पनि कोरोना संक्रमण फैलिएको छ । जनप्रतिनिधि र समुदायका मानिसमा संक्रमण देखिएपछि नगरपालिका सिल गरिएको प्रमुख जिल्ला अधिकारी बसुदेव अधिकारीले बताए ।