June 20, 2021, Sunday
६ असार २०७८, आईतवार

चन्द्रागिरि हिल्सको साधारण शेयर बिक्री सुरु

चन्द्रागिरि हिल्सको साधारण शेयर बिक्री सुरु

१७ मंसिर काठमाण्डौ ।


काठमाण्डु उपत्यकामा केवलकार सञ्चालन गर्दै आएको चन्द्रागिरि हिल्सले आजदेखि साधारण शेयर बिक्री गर्न थालेको छ । वास्तविक क्षेत्रलाई समेत शेयर बजारमा ल्याउने लक्ष्यसाथ सरकारले अगाडि बढाएको नीतिअनुसार चन्द्रागिरि हिल्स लिमिटेडले साधारण शेयर बिक्री गर्ने भएको हो ।


नेपाल धितोपत्र बोर्डले साधारण शेयर बिक्रीका लागि अनुमतिसमेत प्रदान गरिसकेको छ । विवरणअनुसार पहिलो चरणको साधारण शेयर बिक्री छिटोमा आगामी पुस १ गतेसम्म र ढिलोमा आगामी पुस १६ गतेसम्म हुनेछ । कम्पनीले आयोजना प्रभावितका लागि प्रति शेयर १०० का दरले तीन लाख छ हजार ८१९ कित्ता बिक्री गर्नेछ ।


आयोजना प्रभावित क्षेत्रमा काठमाडौँ जिल्लाअन्तर्गत चन्द्रागिरि नगरपालिका ३, ४, ६ र ७ साविक थानकोट गाविसाका सम्पूर्ण वडा र साविक महदेवस्थान गाविसको वडा नं ३, ४, ५, ६, ७, ८ एवं मकवानपुर जिल्लाको थाहा नगरपालिका वडा नं ९ र १० रहेका छन् ।


बिक्री प्रबन्धकका अनुसार कम्पनीको साधारण शेयरमा न्यूनतम १० कित्तादेखि अधिकतम तीन हजार ६० कित्तासम्म आवेदन दिन सकिनेछ । यस्तै दोस्रो चरणमा आम सर्वसाधारणका लागि १५ लाख ३४ हजार ९१ कित्ता शेयर बिक्री गरिनेछ ।


धितोपत्र बोर्डबाट कम्पनीले रु १८ करोड ४० लाख बराबरको साधारण शेयर बिक्रीका लागि अनुमति पाएको छ । कम्पनीको शेयर बिक्री प्रबन्धकमा ग्लोबल आइएमई क्याटिल रहेको छ ।
साधारण शेयर बिक्री पछि कम्पनीको कूल चुक्तापूँजी एक अर्ब ५३ करोड पुग्नेछ । कम्पनीमा ८८५ जनाको संस्थापक लगानी छ ।