April 14, 2021, Wednesday
१ बैशाख २०७८, बुधबार

कोरोना बिमामा परेका कुल दाबीमध्ये ५६ प्रतिशत बिमितले पाए ४ अर्ब ६६ करोड भुक्तानी

कोरोना बिमामा परेका कुल दाबीमध्ये  ५६ प्रतिशत बिमितले पाए ४ अर्ब ६६ करोड भुक्तानी

फागुन २३, काठमाडौं ।
कोरोना बिमामा परेका दाबीमध्ये हाल सम्म ४८ हजार ६९ जनाले भुक्तानी पएका छन् । यो कागजात पुगेका कुल दाबीको ५६ प्रतिशत हो । कोरोना बिमाको माग दाबी गर्नेहरूमध्ये कागजात पुगेका उक्त संख्यालाई कुल ४ अर्ब ६६ करोड ३० लाख रुपैयाँ बराबरको भुक्तानी गरेको नियामक निकाय बिमा समितिले जनाएको छ । बिमा समितिका अनुसार हालसम्म सबै बिमा कम्पनीमा गरी ८४ हजार ८ सय ७४ भन्दा बढी बिमा दाबी परेको जनाइएको छ ।

भुक्तानी हुन बाँकी दाबीमध्ये ३ हजार १ सय १२ वटा स्वीकृतिको प्रक्रियामा रहेको, १० हजार ९ सय ४६ वटा दाबी इपिडिमियोलोजी तथा रोग नियन्त्रण महाशाखाले छानबिन गरिरहेको छ । त्यस्तै ४ हजार २ सय ३३ वटा दाबी महाशाखामा पठाउने तयारीमा रहेका छन् । १४ हजार ३ सय ९३ दाबीउपर छानबिन भइरहेको र ३ हजार ६ सय ३९ वटा दाबी भुक्तानी कागजपत्र अपुग भएका कारण कम्पनीमा फिर्ता पठाइएको छ । त्यस्तै ४ सय ८२ वटा दाबी भने भुक्तानी योग्य नरहेको समितिले जनाएको छ । कोभिड–१९ को जोखिम सुरक्षणका लागि गत वैशाख ७ देखि बिमालेख बिक्री थालिएको हो । बीचमा विवाद बढेपछि भदौ २८ यता बिमा समितिले पुरानो बिमालेख खारेज गरी नयाँ जारी गर्न निर्देशन दिएको थियो । नयाँ बिमा लेखमा सामूहिक रूपमा प्रतिव्यक्ति १ लाख रुपैयाँको मात्र बिमा गर्न पाइन्छ । जसमा कोरोना संक्रमित भएको प्रमाणित भएपछि घरमै आइसोलेसनमा बसेको भए एकमुष्ट २५ हजार र अस्पतालमा उपचार गराएको भए उपचार खर्चअनुसार बढीमा ७५ हजार रुपैयाँसम्म भुक्तानी पाइन्छ ।

भदौ २८ अघि बिमा गरेका बिमितले भने कोरोना प्रमाणित भएपछि एकमुष्ट ५० हजार र १ लाख रुपैयाँ भुक्तानी पाउँछन । कोरोना संक्रमण बढ्दै गएपछि कम्पनीहरूले धान्न नसक्ने भन्दै जेठ २२ गतेबाट बिमा कार्यक्रम बन्द गरेका थिए । तर, अर्थमन्त्रालयको दबाब दिएपछि एक दिनमै २३ गतेबाट पुनः सुरु गरिएको थियो । जसमा १० हजार जनासम्मको दाबी भुक्तानी निर्जीवन बिमा कम्पनीले, १० हजारदेखि २० हजारसम्मको दाबी पुनर्बिमा कम्पनीले, २५ हजारसम्मको दाबी निर्जीवन कम्पनीको महाविपत्ति कोषबाट, २५ देखि ३५ हजारसम्मको दाबी बिमा समितिले र ३५ हजारभन्दा माथिको दाबी सरकारले बेहोर्ने सहमति गरिएको छ ।

भदौ २८ गते पुनः मापदण्ड संशोधन गरी बिमितलाई उपचार खर्चका आधारमा दाबी भुक्तानी दिने गरी स्वास्थ्य बिमाको स्वरूपमा संशोधन गरिएको छ । बिमक संघको सहमतिअनुसार बिमा कम्पनीले मापदण्ड पुगेका सबै दाबी बिमा (पुल) मा पठाउने, पुलले पाँच दिनभित्र सबै प्रक्रिया पूरा गरी सम्बन्धित कम्पनीमा फिर्ता पठाउने र त्यसको दुई दिनभित्र कम्पनीले बिमितलाई भुक्तानी दिनुपर्नेछ । बिमा कम्पनीहरूले हरेक दिनजसो दाबी भुक्तानी दिइरहे पनि भुक्तानी नपाएको गुनासो आइरहेको छ ।