झापा जिल्लामा गत आर्थिक वर्षमा ५१ किलोमिटर सडक कालोपत्र भएको देखिएको छ ।
जिल्ला पूर्वाधार विकास कार्यालयले गत आवमा ३२.८० किलोमिटर सडक ग्राभेल, ९.५२ किलोमिटर सडकमा आरसिसी ढलान तथा ९०० मिटर मर्मतसम्भार गरिएको जनाएको छ ।
उक्त कार्यालयका प्रमुख राजेश्वर महतोका अनुसार गत आवमा छ वटा झोलुङ्गे, तीन सरकारी भवन, ४९ सामुदायिक भवन, ११ धार्मिक संरचना, आठ विद्यालयका पूर्वाधार, एउटा कभर्डहल तथा आठ अन्य भवन तथा पूर्वाधार निर्माण भएका छन् ।
गत आवमा १ अर्ब ५१ करोड १४ लाख ७८ हजार रुपैयाँ विनियोजन भएकामा १ अर्ब ५ करोड ४५ लाख ६४ हजार ५४० रुपैयाँ खर्च भएको विवरणमा उल्लेख छ ।
