नेपाल बैंकको निक्षेप २४ प्रतिशतभन्दा धेरैले बढ्यो
बैंक तथा वित्तीय संस्थामा तरलता अभाव भईरहेका बेला नेपाल बैंकले भने निक्षेप संकलन तथा कर्जा विस्तारमा उच्च वृद्धि गरेको छ । वैशाखमा नेपालका २७ वटा वाणिज्य बैंकहरुमध्ये निक्षेप संकलन तथा कर्जा प्रवाह वृद्धिमा नेपाल बैंक पहिलो भएको बैंकले जनाएको छ । वैशाखसम्ममा बैंकको निक्षेप २४.३५ प्रतिशतले वृद्धि भएको छ । कर्जा विस्तार भने ३१.९८ प्रतिशतले वृद्धिभएको बैंकले जानकारी दिएको छ । २७ वाणिज्य बैंकहरुमध्ये १९ वटा वाणिज्य बैंकहरुको निक्षेप वृद्धिभएको छ भने ८ वटा वाणिज्य बैंकहरुको निक्षेपमा गिरावट आएको छ । वाणिज्य बैंकहरुको औसत निक्षेप वृद्घिदर ६.२३ प्रतिशत छ ।
त्यसैगरी २७ वटै वाणिज्य बैंकहरुको कर्जा विस्तार पनि बढेको छ । औसतमा वाणिज्य बैंकहरुको कर्जा विस्तार १७.४३ प्रतिशतले बढेको छ । वैशाखमा वाणिज्य बैंकहरुसँग कुल निक्षेप ४३ खर्ब ६९ अर्ब रुपैयाँ पुगेको छ भने कुल कर्जा प्रवाह ४१ खर्ब ९१ अर्ब रुपैयाँ पुगेको छ । नेपाल बैंकर्स संघको तथ्यांकअनुसार यस अवधिमा १८ वटा वाणिज्य बैंकहरुको कर्जा निक्षेप अनुपात (सीडी रेसियो) नेपाल राष्ट्र बैंकले तोकेको सिमा ९० प्रतिशतभन्दा बढी छ । नेपाल बैंकको कर्जा निक्षेप अनुपात (सीडी रेसियो) भने राष्ट्र बैंकले तोकेको सिमाभित्र नै (८९.६५ प्रतिशत) रहेको बैंकले जनाएको छ । औसतमा वाणिज्य बैंकहरुको कर्जा निक्षेप अनुपात ९०.८८ प्रतिशत छ ।
प्रतिकृया दिनुहोस्