July 29, 2021, Thursday
१४ श्रावण २०७८, बिहीबार

शेयर बजारमा तीव्र उतारचढाव, कारोबार १० अर्ब ९० करोडमा सीमित

शेयर बजारमा तीव्र उतारचढाव, कारोबार १० अर्ब ९० करोडमा सीमित

शेयर बजारमा बिहीबार तीव्र उतारचढाव देखिएको छ । बजार खुलेको केही समयपछि नै नेप्से तिव्र गतिमा ओरालो लागेको थियो । त्यस्को केही समयपछि नै पुनः तीव्र बढेको नेप्से फेरि ओरालो लाग्यो । त्यसपछि बजार पुनः उकालो लागेर करिब ३००० विन्दु नजिक पुगेको नेप्से, साढे १ बजेपछि पुनः ओरालो लागेको थियो । बजारमा बिहीवार कारोबार रकममा पनि उल्लेख्य गिरावट आएको छ । साताको अन्तिम दिन बिहीबार सेयर कारोबार मापक नेप्से परिसूचक झिनो अंकले घटेको छ । बुधबार ५२ अंकले घटेको नेप्से परिसूचक बिहीबार भने १ दशमलव ३ अंकले घटेर २ हजार ९ सय ६८ दशमल ४२ अंकमा झरेको छ ।

नेपाल धितोपत्र बोर्डले जोखिमयुक्त ५१ वटा कम्पनीको सूची सार्वजनिक गरेसँगै शेयर बजारमा कारोबार ह्वात्तै घट्न र बढ्न थालेको हो । बिहीबार १० अर्ब ९० करोड रुपैयाँ बराबरका दुई करोड तीन लाख ७५ हजार कित्ता शेयर किनबेच भएको छ । बुधबार १५ अर्ब ४५ करोड रुपैयाँ बराबरको दुई करोड ८२ लाख कित्ता शेयर कारोबार भएको थियो । यस दिन बैंकिङ १०, ब्यापार १४, जलविद्युत २, उत्पादन ११ र माइक्रोफाइनान्स ६४ अंकले घट्यो।

त्यस्तै होटल तथा पर्यटन ३६, विकास बैंक ९४, फाइनान्स ३३, निर्जीवन बीमा ५२, अन्य २६ र जीवन बीमा १५ अंकले बढेको छ। यस दिन खानीखोल हाइड्रोको मूल्य ६ प्रतिशतले बढ्यो। त्यस्तै नेपाल फाइनान्स, ग्रीन डेभलपमेन्ट बैंक, कर्णाली विकास बैंक र सोल्टी होटलको मूल्य ५ प्रतिशतले बढ्यो।

यस दिन नेपाल पुनर्बीमा कम्पनीको सबैभन्दा धेरै रकम ७७ करोडको कारोबार भएको छ। कम्पनीको मूल्य भने ३ प्रतिशतले बढेको छ। त्यस्तै नेसनल हाइड्रोपावरको ३० करोड तथा नेपाल इन्स्योरेन्स कम्पनीको २७ करोड बराबरको कारोबार भयो।