July 26, 2021, Monday
११ श्रावण २०७८, सोमबार

ललितपुरमा भेरोसेल खोपको दोस्रो मात्रा शुक्रवार र शनिवार लगाइँदै

ललितपुरमा भेरोसेल खोपको दोस्रो मात्रा शुक्रवार र शनिवार लगाइँदै

असार २३, काठमाडौं ।

चीनबाट खरिद गरिएको भेरोसेल खोपको दोस्रो मात्रा ललितपुरमा आउँदो शुक्रवार र शनिवार लगाइने भएको छ ।पहिलो मात्राको खोप लगाएका ६० देखि ६४ वर्ष उमेर समूहका नागरिकलाई यही असार २५ र २६ गते उक्त कार्यक्रम गर्न लागिएको हो । जिल्ला स्वास्थ्य कार्यालय, ललितपुरले सूचना प्रकाशित गरी कोरोनाविरुद्धको खोपको दोस्रो डोज लिन आग्रह गरेको छ।

ललितपुरमा चिनियाँ खोप भेरोसेलको दोस्रो डोज  गोदावरी नगरपालिकाका १४ वडाबाटै उक्त खोप शुक्रवार लगाइने भएको छ । खोपका लागि गोदावरीका सम्बन्धित वडाका स्वास्थ्यचौकीका साथै टौखेलस्थित किटिनी र वडा नं १२ मा रहेको सरस्वती माध्यमिक विद्यालय तथा आनन्दवन अस्पताल एवं वडा नं ११ कार्यालयबाट समेत सेवा दिइने नगरपालिकाले जारी गरेको सूचनामा उल्लेख छ ।

पहिलो मात्राको खोप लगाई दोस्रो मात्रा लगाउन छुटेकालाई पहिलो मात्रा लगाएको कार्ड र फोटोसहितको परिचयपत्र अनिवार्य साथमा लिई आफूलाई पायक पर्ने केन्द्रमा जान अनुरोध गरिएको जिल्ला जनस्वास्थ्य कार्यालय ललितपुरका प्रमुख डा खगेश्वर गेलालले सूचनामार्फत जानकारी गराएका छन् ।