July 24, 2021, Saturday
९ श्रावण २०७८, शनिबार

चीनबाट आइपुग्यो कोरोनाविरुद्धको आठ लाख खोप, ५५ वर्षभन्दा माथिका नागरिकलाई लगाइने

चीनबाट आइपुग्यो कोरोनाविरुद्धको आठ लाख खोप, ५५ वर्षभन्दा माथिका नागरिकलाई लगाइने

चीनबाट खरीद गरेर ल्याईने भनेको कोरोनाभाइरसविरुद्धको खोप ‘भेरोसेल’को काठमाडौं आइपुगेको छ । शुक्रवार बिहान नेपाल वायुसेवा निगमको वाइडबडी जहाजबाट आठ लाख डोज खोप नेपाल ल्याइएको हो ।

चीनको बेइजिङबाट आठ लाख डोज खोप ल्याएको स्वास्थ्य सेवा विभागको खोप शाखाका प्रमुख डा. झलक शर्मा गौतमले बताए । ‘आज बिहान वाइडबडीले पहिलो चरणमा आठ लाख डोज खोप ल्याएको छ’–गौतमले भने । नेपालले चीनको सिनोफार्म कम्पनीबाट ४० लाख डोज खोप खरीद गरेको छ । त्यसमध्ये पहिलो खेपमा निगमको जहाजले आठ लाख डोज ल्याएको हो ।

त्यस्तै, फेरि दोस्रो खेपका लागि ३१ असारमा निगमको जहाज चीन जाने कार्यतालिका रहेको छ । यससँगै तेस्रो खेपमा खोप ल्याउन निगमको जहाज ७ साउनमा चीन जाने भएको छ । अर्को साताबाट खोप लगाउने तयारी रहेको खोप शाखा प्रमुख डा. गौतमले जानकारी दिए ।

आज ल्याएको खोप ५५ वर्षभन्दा माथिका नागरिकलाई लगाइने स्वास्थ्य तथा जनसंख्या मन्त्रालयले जनाएको छ । यसअघि चीनले अनुदानमा भेरोसेल खोप दिएको थियो । जुन खोप हाल लगाइँदै छ ।