कांग्रेसका उपसभापति विजय गच्छदार १० लाख रुपैयाँ धरौटीमा रिहा
नेपाली कांग्रेसका उपसभापति विजय गच्छदार १० लाख रुपैयाँ धरौटीमा रिहा भएका छन् । ललिता निवास जग्गामा भ्रष्टाचारको आरोप लागेका गच्छदारको बुधबार विशेष अदालतमा थुनछेक बहस भएको थियो । ललिता निवासको जग्गाको मुद्दा लागेपछि फरार गच्छदार बुधबार विशेष अदालतमा उपस्थित भएका थिए । गच्छदार बुधबार बिहान १० बजे उपस्थित भएपछि चार घण्टासम्म उनको बयान लिइएको थियो । उनको बयान सकिएपछि साढे २ बजेदेखि थुनछेक बहस सुरु भएको थियो ।
विशेष अदालतका अध्यक्ष तथा न्यायाधीश प्रेमराज कार्की, न्यायाधीशद्वय अब्दुल अजिज् मुसलमान र नित्यानन्द पाण्डेयको इजलासले उनलाई धरौटीमा छोड्न आदेश दिएको हो । अख्तियार दुरुपयोग अनुसन्धान आयोगले उनी मन्त्री हुँदा ९ करोड ६५ लाख रुपैयाँ भ्रष्टाचार गरेको अभियोग लगाउँदै २२ माघ २०७६ मा मुद्दा दायर गरेको थियो ।
ललिता निवासको जग्गा व्यक्तिको नाममा गरेको भन्दै गच्छदार सहित १७५ जनाविरुद्ध अदालतमा मुद्दा दायर भएको थियो । २२ माघ २०७६ मा अख्तियार दुरुपयोग अनुसन्धान आयोगले ललिता निवासको जग्गा अनियमिततामा संलग्न भएको आरोपमा एक पूर्वउपप्रधानमन्त्री, तीन पूर्वमन्त्रीसहित १७५ जनाविरुद्ध मुद्दा दायर गरेको थियो । अहिलेसम्म केही आरोपितहरु विशेष अदालतमा उपस्थित भएर धरौटी वा तारिखमा छुटेका छन् भने केही थुनामा छन् ।
प्रतिकृया दिनुहोस्