पुँजीगत खर्च लक्ष्यको ६४ दशमलव ५३ प्रतिशत, अन्तिम हप्तामा मात्रै २३ प्रतिशत खर्च
कोरोना संक्रमणको महामारी पछि भएको निषेधाज्ञा र राजनैतिक अस्तिरताले गर्दा सरकारले लक्ष्य अनुसारको पूजीगत खर्च गर्न सकेन । गरेको बजेट पनि समयमा बजेट खर्च गर्न नसक्दा यस वर्ष धेरै आयोजना असारे विकासका रुपमा सकिएका छन् ।
सरकारले गत आर्थिक वर्ष २०७७÷०७८ मा ३ खर्ब ५३ अर्ब रुपैयाँ बराबरको पुँजीगत खर्च गर्ने लक्ष्य लिएको थियो । जसमा आर्थिक वर्ष सकिँदा जम्मा २ खर्ब २७ अर्ब मात्र खर्च गरेको छ । महालेखा नियन्त्रक कार्यालयका अनुसार यो रकम ६४ दशमलव ५३ प्रतिशत बराबरको मात्र हो । अघिल्लो आर्थिक २०७६÷०७७ मा भन्दा ३६ अर्बले पुँजीगत खर्च बढेपनि संशोधित लक्ष्यअनुसारको खर्च नभएको हो ।
बजेट खर्च गर्न मिल्ने अन्तिम दिन अर्थात् गत बुधबार मात्रै सरकारले १५ अर्ब ९७ करोड रुपैयाँ बराबरको पुँजीगत खर्च गरेको छ । कानुनी रुपमा २५ गते पछि अति आवश्यकबाहेक अन्य चेक काट्न नपाइने भएपनि संघीय सरकारले खर्च गरेको हो । त्यसो त सरकारले अन्तिम एक हप्तामा मात्र २३ प्रतिशत रकम खर्च गरेको छ । सरकारले ५२ अर्ब ४९ करोड रुपैयाँ रकम अन्तिम हप्तामा खर्च गरेको महालेखाले जनाएको छ । सरकारले कुल बजेटको ३७ प्रतिशत खर्च असारमा गरेको छ । जुन रकम ८४ अर्ब ६४ करोड रुपैयाँ हुन आउँछ ।
यसअघि सरकारले प्रतिदिन औषत ४२ करोड ८४ लाखका हिसाबले खर्च गर्दै आएको थियो । यस्तै सरकारले ८९ दशमलव ७३ प्रतिशत अर्थात् ८ खर्ब ५१ अर्ब रुपैयाँ चालु तथा ५८ दशमलव ४४ प्रतिशत अर्थात् १ खर्ब वित्तीय व्यवस्थापन गरेर कुल ८० दशमलव ०३ प्रतिशत अर्थात् ११ खर्ब ८० करोड रुपैयाँ खर्च गरेको छ ।
अघिल्लो वर्ष सरकारले कुल १० खर्ब ९४ अर्ब रुपैयाँ खर्च गरेको थियो । जसमा चालुतर्फ ७ खर्ब ८६ अर्ब र वित्तीय व्यवस्थापनतर्फ १ खर्ब १६ अर्ब खर्च भएको थियो ।
#पुँजीगत खर्च
प्रतिकृया दिनुहोस्