July 29, 2021, Thursday
१४ श्रावण २०७८, बिहीबार

वाणिज्य बैंकहरूद्वारा ४२ खर्ब निक्षेप संकलन, ३७ खर्ब कर्जा लगानी

वाणिज्य बैंकहरूद्वारा ४२ खर्ब निक्षेप संकलन, ३७ खर्ब कर्जा लगानी

साउन ५, काठमाडौं ।

गत आर्थिक वर्ष ०७७/७८ मा सञ्चालनमा रहेका २७ वटा वाणिज्य बैंकले ४२ खर्ब रुपियाँ भन्दा बढी निक्षेप संकलन गरेका छन् । कोरोना संक्रमणका कारण मुलुकको सिंगो अर्थतन्त्रमा नकारात्मक असर पारिरहेका बेला बैंकहरूले भने ४२ खर्ब २ अर्ब रुपियाँ निक्षेप संकलन गर्न सफल भएका हुन् ।

त्यस्तै, कर्जा लगानी २९ खर्ब ३ अर्बबाट बढेर ३७ खर्ब २१ अर्ब रुपैयाँ पुगेको तथ्यांक छ । सो अवधिमा निक्षेप २० दशमलव ४८ प्रतिशतले बढ्दा कर्जा लगानी २८ दशमलव १६ प्रतिशतले बढेको छ । गत आवको मौद्रिक नीतिले भने कर्जा लगानीको वृद्धि २० प्रतिशतमा सीमित राख्ने लक्ष्य लिएको थियो । लक्ष्यभन्दा २ खर्ब ३७ अर्ब रुपैयाँले कर्जामा वृद्धि भएको छ । बैंकहरूले निक्षेप रकमको करिब ८८ प्रतिशतसम्म कर्जा लगानी गरेका छन् । बैंकहरूले प्राथमिक पुँजी र निक्षेप रकमसमेत जोडेर हुने रकमको भने ७७ दशमलव ३८ प्रतिशत कर्जा लगानी गरेका छन् ।

अघिल्लो वर्षको सोही अवधिमा १३ दशमलव ३ प्रतिशतले निक्षेप बढेको थियो । वार्षिक बिन्दुगत आधारमा जेठ मसान्तमा बैंक तथा वित्तीय संस्थाहरूमा रहेको निक्षेप २० दशमलव ८ प्रतिशतले बढेको छ । जेठमा बैंक तथा वित्तीय संस्थाहरूको कुल निक्षेपमा चल्ती, बचत र मुद्दतीको अंश क्रमशः ८ दशमलव ६ प्रतिशत, ३४ दशमलव ३ प्रतिशत र ४८ दशमलव ५ प्रतिशत रहेको छ । अघिल्लो वर्ष यस्तो अंश क्रमशः ८ दशमलव ७ प्रतिशत, ३२ दशमलव २ प्रतिशत र ४८ दशमलव २ प्रतिशत रहेको थियो ।त्यस्तै जेठ मसान्तमा बैंक तथा वित्तीय संस्थाहरुको कुल निक्षेपमा संस्थागत निक्षेपको अंश ४१ दशमलव २२ प्रतिशत रहेको छ । २०७७ जेठ मसान्तमा यस्तो निक्षेपको अंश ४४ दशमलव ९८ प्रतिशत रहेको थियो । उक्त अवधिमा कर्जातर्फ २४ दशमलव ९ प्रतिशतले बढेको छ । अघिल्लो वर्षको सोही अवधिमा यस्तो कर्जा १० दशमलव ७ प्रतिशतले बढेको थियो ।

आर्थिक वर्ष २०७७-७८ को ११ महिनामा बैंक तथा वित्तीय संस्थाहरुको लगानीमा रहेको कर्जामध्ये कृषि क्षेत्रतर्फको कर्जा ४० दशमलव २ प्रतिशतले, औद्योगिक उत्पादन क्षेत्रतर्फको कर्जा १९ दशमलव १ प्रतिशतले, निर्माण क्षेत्रतर्फको कर्जा १४ दशमलव ६ प्रतिशतले, यातायात, सञ्चार तथा सार्वजनिक सेवा क्षेत्रतर्फको कर्जा १५ दशमलव ९ प्रतिशतले, थोक तथा खुद्रा व्यापार क्षेत्रतर्फको कर्जा २५ दशमलव ४ प्रतिशतले र सेवा उद्योग क्षेत्रतर्फको कर्जा १८ दशमलव २ प्रतिशतले बढेको छ । समीक्षा अवधिमा बैंक तथा वित्तीय संस्थाबाट प्रवाहित कर्जामध्ये आवधिक कर्जा २४ दशमलव ८ प्रतिशतले, ओभरड्राफ्ट कर्जा २८ दशमलव २ प्रतिशतले, डिमान्ड तथा चालू पुँजी कर्जा २४ दशमलव १ प्रतिशतले, रियल स्टेट कर्जा ११ दशमलव ९ प्रतिशतले, मार्जिन प्रकृति कर्जा ८७ दशमलव ६ प्रतिशतले र ट्रस्ट रिसिट कर्जा ५३ दशमलव २ प्रतिशतले बढेको छ भने हायर पर्चेज कर्जा ५ दशमलव ५ प्रतिशतले घटेको छ ।

आर्थिक वर्ष २०७६(७७ मा कर्जाको वृद्धिदर १६ दशमलव ४० प्रतिशत रहेकोमा आव २०७५-७६ मा १८ दशमलव ३७ प्रतिशत, आव २०७४(७५ मा २१ दशमलव ७३ प्रतिशत, आव २०७३-७४ मा २५ दशमलव ७२ प्रतिशत र अब २०७२-७३ मा बैंकहरुको कर्जाको वृद्धिदर २६ दशमलव ९४ प्रतिशत रहेको थियो।नेपाल बैंक, नबिल, मेगा, नेपाल इन्भेष्टमेन्ट र स्ट्यान्डर्ड चार्टर्ड बैंकको निक्षेपभन्दा कर्जा वृद्धि धेरै देखिएको हो । एक वर्षमा नेपाल बैंकको २० अर्बले निक्षेप बढ्दा ३७ अर्बले कर्जा बढेको छ । त्यस्तै, नबिलको करिब ३५ अर्बले निक्षेप बढ्दा कर्जा ५२ अर्बले, मेगाको करिब १३ अर्बले निक्षेप बढ्दा कर्जा २७ अर्बले बढेको छ ।

इन्भेष्टमेन्ट बैंकको निक्षेप ७ अर्बले बढ्दा कर्जा १५ अर्बले र स्ट्यान्डर्डको निक्षेप करिब ३ अर्ब रुपैयाँले घट्दा कर्जा १४ अर्बले बढेको हो । निक्षेप रकम घट्नेमा नेपाल एसबिआई बैंकसमेत छ । बैंकको अघिल्लो आवको तुलनामा ४ अर्बले निक्षेप रकम घटेर १ खर्ब ६ अर्बमा सीमित भएको छ । अघिल्लो आवको तुलनामा गत आवमा सिभिल, सिटिजन्स र एनआइसी एसियाको कर्जा लगानी भने सबैभन्दा धेरैले बढेको छ ।सिभिलको कर्जा लगानी करिब ५५ प्रतिशतले बढेर ८३ अर्ब रुपैयाँ पुगेको हो । सिटिजन्स र एनआइसी एसिया दुवैको कर्जा लगानी ५२ प्रतिशतले बढेर क्रमशः १ खर्ब २३ अर्ब र २ खर्ब ६४ अर्ब पुगेको हो ।