September 18, 2021, Saturday
२ आश्विन २०७८, शनिबार

अन्तर्राष्ट्रिय व्यापार सहज गर्न आउँदो साताबाट एकद्वार प्रणाली शुरु गरिने

अन्तर्राष्ट्रिय व्यापार सहज गर्न आउँदो साताबाट एकद्वार प्रणाली शुरु गरिने

माघ ७, काठमाडौं ।

सरकारले आयात र निर्यातलाई सहजीकरण गर्न एकद्वार प्रणाली सुरु गर्ने भएको छ ।  भन्सारसँग आवद्ध गरी अन्तरराष्ट्रिय व्यापारलाई सहजीकरण गर्न आगामी सातादेखि नेपाल राष्ट्रिय एकद्वार प्रणाली शुरु गरिने भएको हो । अर्थ मन्त्रालयमा बुधवार आयोजित कार्यक्रममा भन्सार विभागले आगामी सातादेखि खाद्य प्रविधि तथा गुण नियन्त्रण विभाग, पशु सेवा विभाग र प्लाण्ट क्वारेन्टाइन केन्द्रमा एकद्वार प्रणाली शुरु गर्ने जानकारी दिएको हो ।

Advertisement

तीनवटा विभागबाट सुरु गरिने कार्यक्रम चरणवद्ध रुपमा विस्तार गरिने र यसमा सरकारी र निजी क्षेत्र रहनेछन् ।  एकद्वार प्रणाली सुरु भएपछि तीनवटै विभाग र अन्तर्गतका कार्यालयहरुमा डिजिटल प्रणालीको शुरुवात हुनेछ । लाइसेन्स वा अनुमतिका लागि निकास तथा पैठारीकर्ताहरु विभाग तथा कार्यालयहरुमा पुगि राख्नु पर्ने छैन भने पनि पेपरवर्कको पनि अन्त्य हुने छ ।

भन्सार विभागका महानिर्देशक सुमन दाहालले व्यापारसँग जोडिएका सरकारी र निजी गरी ४० ओटा निकायमा एकद्वार प्रणाली लागू गरिने जानकारी दिए ।  एकद्धार प्रणालीबारे बोल्दै अर्थमन्त्री विष्णुप्रसाद पौडेलले एकद्वार प्रणाली सुरु भएपछि व्यापारका लागि सहजीकरण हुने, अनियमितता र राजस्व चुहावट नियन्त्रण हुने, कार्य सम्पादन छिटो र प्रभावकारी हुने विश्वास व्यक्त गरे । उद्योग वाणिज्य तथा आपूर्तिमन्त्री लेखराज भट्टले कार्यान्वयनका लागि दक्ष जनशक्तिको व्यवस्था गर्न र अनुगमन प्रणालीमा विशेष ध्यान आवश्यक रहेको बताए  ।

यस्तै कृषि तथा पशुपंछि विकास पद्माकुमारी अर्यालले एकद्वार प्रणालीले सेवा प्रवाहलाई पारदर्शी बनाउने बताउँदै सबै निकायमा पूर्ण रुपमा लागू गर्ने बताइन् । राजस्व सचिव रामशरण पुडासैनीले एकद्वार प्रणालीलेले राजस्व परिचालनमा थप सहयोग पुर्‍याउने बताए ।