February 2, 2023, Thursday
१९ माघ २०७९, बिहीबार

वित्तीय प्रणालीमा तरलता बढेपछि २० अर्ब निक्षेप संकलन गर्दै राष्ट्र बैंक

वित्तीय प्रणालीमा तरलता बढेपछि २० अर्ब निक्षेप संकलन गर्दै राष्ट्र बैंक

साउन १३, काठमाडौं ।
नेपाल राष्ट्र बैंकले २० अर्ब रुपैयाँबराबरको निक्षेप संकलन उपरकण जारी गर्ने भएको छ । राष्ट्र बैंकका अनुसार साउन १३ गते अर्थात् आज बुधबार अपराह्न ३ बजेसम्ममा उक्त परिमाणमा मौद्रिक उपकरण जारी गर्न लागिएको हो । केन्द्रीय बैंकले वित्तीय प्रणालीमा भएको अधिक तरलतालाई सन्तुलन कायम गर्नका उक्त निक्षेप संकलन जारी गर्न लागेकोे जनाएको छ ।

Advertisement

बोलकबोलको माध्यमद्धारा बिक्री गर्न लागिएको यो निक्षेप संकलन उपकरणको परिपक्व हुुने अवधि १४ दिन तोकिएको छ । सो अनुसार उपकरणको सावाँ ब्याज भुक्तानी मिति भने २०७८ साउन २७ गते तोकिएको छ । निक्षेप संकलन उपकरणको बोलकबोलमा नेपाल राष्ट्र बैंकबाट इजाजतपत्र प्राप्त “क”, “ख” र “ग” बर्गका बैंक तथा वित्तीय संस्था मात्र सहभागी हुन पाउने छन् । निक्षेप संकलनको लागि आह्वान गरिएको रकम बाँडफाँट गर्दा बोलकबोल बमोजिम सबैभन्दा कम ब्याजदरलाई पहिलो प्राथमिकता क्रममा क्रमशः बाँडफाँट गरिने केन्द्रीय बैंकले जनाएको छ ।

खरिदकर्ताहरुले घटीमा पाँच करोड र बढीमा पाँच करोड रुपैयाँले भाग गर्दा निःशेष भाग जाने गरी कुुल आह्वान रकमसम्मको निक्षेप उपकरण खरिद गर्न सक्नेछन् । राष्ट्र बैंकका अनुसार यसरी खरिद गरिएको उपकरण राष्ट्र बैंकबाहेकका बैंक तथा फाइनान्स कम्पनीहरुमा धितोको रुपमा समेत प्रयोग  गर्न सकिनेछ ।

आर्थिक वर्ष २०७७/०७८  मा बैंक तथा वित्तीय संस्थाहरूमा रहेको निक्षेप १५ दशमलव तीन प्रतिशतले बढेको हो । अघिल्लो वर्षको सोही अवधिमा यस्तो निक्षेप १३ दशमलव तीन प्रतिशतले बढेको थियो । वार्षिक विन्दुगत आधारमा २०७८ जेठ मसान्तमा बैंक तथा वित्तीय संस्थाहरूमा रहेको निक्षेप २० दशमलव आठ प्रतिशतले बढेको छ । २०७८ जेठमा बैंक तथा वित्तीय संस्थाहरूको कुल निक्षेपमा चल्ती, बचत र मुद्दतीको अंश क्रमशः आठ दशमलव छ प्रतिशत, ३४ दशमलव तीन प्रतिशत र ४८ दशमलव पाँच प्रतिशत रहेको छ ।

अघिल्लो वर्ष यस्तो अंश क्रमशः आठ दशमलव सात प्रतिशत, ३२ दशमलव दुई प्रतिशत र ४८ दशमलव दुई प्रतिशत रहेको थियो । २०७८ जेठ मसान्तमा बैंक तथा वित्तीय संस्थाहरुको कुल निक्षेपमा संस्थागत निक्षेपको अंश ४१ दशमलव २२ प्रतिशत रहेको छ । राष्ट्र बैंकका अनुसार २०७७ जेठ मसान्तमा यस्तो निक्षेपको अंश ४४ दशमलव ९८ प्रतिशत रहेको थियो । राष्ट्र बैंकका अनुसार आर्थिक वर्ष २०७७/०७८ को ११ महिनामा बैंक तथा वित्तीय संस्थाहरुबाट निजी क्षेत्रमा प्रवाहित कर्जा २४ दशमलव नौ प्रतिशतले बढेको छ । अघिल्लो वर्षको सोही अवधिमा यस्तो कर्जा १० दशमलव सात प्रतिशतले बढेको थियो । वार्षिक विन्दुगत आधारमा २०७८ जेठ मसान्तमा बैंक तथा वित्तीय संस्थाहरुबाट निजी क्षेत्रतर्फ प्रवाहित कर्जा २६ दशमलव तीन प्रतिशतले बढेको छ ।

आर्थिक वर्ष २०७७/७८ कोमा बैंक तथा वित्तीय संस्थाहरुको लगानीमा रहेको कर्जामध्ये कृषि क्षेत्रतर्फको कर्जा ४० दशमलव दुई प्रतिशतले, औद्योगिक उत्पादन क्षेत्रतर्फको कर्जा १९ दशमलव एक प्रतिशतले, निर्माण क्षेत्रतर्फको कर्जा १४ दशमलव छ प्रतिशतले, यातायात, सञ्चार तथा सार्वजनिक सेवा क्षेत्रतर्फको कर्जा १५ दशमलव नौ प्रतिशतले, थोक तथा खुद्रा व्यापार क्षेत्रतर्फको कर्जा २५ दशमलव चार प्रतिशतले र सेवा उद्योग क्षेत्रतर्फको कर्जा १८ दशमलव नौ प्रतिशतले बढेको छ ।