अब मोबाइलबाटै जागिरः नेपालमै पहिलो पटक भर्चुअल जब फेयर सञ्चालन हुने

वाणिज्य न्युज
१३ माघ २०७६

१३ माघ, २०७६, काठमाडौं ।
इन्टरनेटको बढ्दो प्रयोगसँगै मोबाइल तथा कम्प्युटरबाट नै जागिरको खोजी गराउन आस्कमी म्यानेजमेन्टले बुधबार र बिहीबार दुई दिनसम्म नेपालमै पहिलो पटक भर्चुअल जब फेयर सञ्चालन गर्ने भएको छ । जागिरको खोजीमा भौंतारिएकाहरू तथा जागिर परिवर्तन गर्न चाहनेहरूका लागि जब फेयर उचित गन्तव्य हुने जब फेयर कम्पनीले जनाएको छ ।
यो नेपालमै पहिलो पटक हुन लागेको सबैभन्दा ठूलो अनलाइन जब फेयर हो । यसमा घरमै बसीबसी ल्यापटप वा कम्प्युटरबाटै भिजिट गर्न सकिने छ । यसकालागी कर्पोरेट क्षेत्र, बैंक, बिमा, होटल, उत्पादन तथा प्रशोधनका साथै विविध क्षेत्रसँग सम्बन्धित रोजगारदाता कम्पनीहरूलाई समेत लक्षित गरी अनलाइन जब फेयर सञ्चालन गर्न लागेको आस्कमी म्यानेजमेन्टले जनाएको छ ।
जब फेयर मा ५० भन्दा बढी कम्पनीहरूले आफ्नो अनलाइन स्टल राख्नेछन् । नेपाल तथा विदेश दुबै देशमा रहेकाहरूले आवेदन दिन सक्नेछन् । यसका लागी आस्कमी म्यानेजमेन्टको वेब पोर्टल आस्कमी कन्सल्ट डटकममा लग इन गरेर उपलब्ध गराइएका कम्पनीहरूमा सिधै जब एप्लिकेसन दिन सकिन्छ ।
जागिर खोज्नेहरूले सबैभन्दा पहिले आस्क मी कन्सल्ट डटकममा गएर आफ्ना व्यक्तिगत तथा शैक्षिक योग्यता लगायतका सबै विवरण भरेर एकाउन्ट बनाउनुपर्ने हुन्छ ।
कर्मचारी भर्ना गर्ने कम्पनीले आफूले चाहे जस्तो कर्मचारी जब फेयरबाट लिन सक्नेछन् । कुनै पनि कम्पनीले यो फेयरमा अनलाइन स्टल राख्न चाहेमा आस्क मी कन्सल्ट डटकममा जानुपर्नेछ भने जब खोज्नेहरूले आफूलाई पायक पर्ने स्थान र उपयुक्त जागिरमा आवेदन गर्न सक्छन् । यसरी प्राप्त आवेदन आस्क मीको सफ्टवेयरमार्फत सिधै सम्बन्धित कम्पनीमा पुग्नेछ भने कम्पनीहरूले आफूले खोजेको तथा योग्यता पुगेका आवेदकहरूलाई फोन गरेर अन्तर्वार्ताका लागि बोलाउनेछन् ।
राष्ट्रिय वाणिज्य बैंकको प्रमुख सहकार्यमा आयोजना हुने जब फेयरमा गोल्डेन गेट कलेज साथमा छ । यसका लागी धेरै बैंक तथा इन्स्योरेन्स, ई–सेवा, फोन पे, लोन प्लस डिपोजिट डटकमजस्ता कम्पनीहरूले पनि सहकार्य गरेका छन् ।