गुणले किन्यो यतीका पाँच जेटस्ट्रिम विमान, असोजबाट नियमित उडान
गुण एयरलाइन्सले आगामी असोजबाट धमकेदार पुनरागमन गर्ने भएकोछ । आन्तरिक समस्यका कारण लामो समयसम्म खासै आर्थिक गतिविधी नगरेको गुण समुहले अर्बो लगानी थप्दै पुनरागमनको संकेत दिएको हो ।
बिहीबार यती समूहले ५ बटा जेटस्ट्रिम सिरिजका विमान हस्तान्तरण गरेसँगै गुणले ७ वटा विमानका साथ आन्तरिक उडानमा बलियो उपस्थिति देखाउँने भएको हो । बिहीबार यती समूहका अध्यक्ष ल्हाक्पा सोनाम शेर्पाले गुण समूहका अध्यक्ष शाक्यलाई पाँचवटै जेटस्ट्रिम सिरिजका जहाज हस्तान्तरण गरेका थिए । त्यस अगाडि गुण एयरलाइन्सले हाल २ वटा अमेरिकी बीचक्राफ्ट जहाजबाट पोखरा, भरतपुर, भैरहवा र माउन्टेन फ्लाइट गरिरहेको छ । नयाँ यतिबाट विमान भित्राएपछि बजारमा धमाकेदार पुनारागमन हुने छ ।
गुणले पर्यटन मन्त्रालयबाट उडान संख्या विस्तारको अनुमति पाएसँगै यतीको पाँचवटा जेटिस्ट्रिम जहाज खरिद गरेको गुण समूहका अध्यक्ष राजेन्द्र शाक्यले बताए । ‘हामीहरु उडान अनुमति, आन्तरिक तयारी र विमानको प्राविधिक जाँचको सबै प्रक्रिया पूरा भएपछि असोजबाट नियमित उडान थाल्छौं ।
पाँचैवटा जहाजमार्फत नियमित उडान संचालनका लागि गुण यतिखेर नागरिक उड्डयन प्राधिकरणको एओसी प्रक्रियामा रहेको प्राधिकरणको हवाई सुरक्षा विभागले जानकारी दिएको छ । विभागका अनुसार, पाँच चरणको प्रक्रियामध्ये यतिखेर जहाजको परीक्षण भइरहेको छ । सम्पूर्ण प्रकृया सकेपछि बजारमा गुणको बलियो उपस्थिती रहने छ ।
असोजदेखि सिमरा, भरतपुर, जनकपुर, भद्रपुर, विराटनगर, नेपालगन्ज, तुम्लिङटारलगायतका विभिन्न गन्तव्यमा उडान सेवा विस्तार गर्ने कम्पनीले जनाएको छ । यसका अलावा अन्य विमान थप गरेर देशका दुर्गम क्षेत्रमा समेत उडान गर्ने भएको छ । गुण समुहको घरजग्गा, सुन देखि फिल्म क्षेत्रमा समेत लगानी रहेको छ । पछिल्ला दिनमा केही अप्ठेरोमा रहेको यो समुहले विस्तारै पुरानो लयमा फर्किन बजार कब्जा गर्न थालेको हो ।
प्रतिकृया दिनुहोस्