February 2, 2023, Thursday
१९ माघ २०७९, बिहीबार

सर्वोत्तम सिमेन्टको सेयर खरिद बिवादः धितोपत्र बोर्डपछि नेप्सेलाई समेत स्पष्टिकरण

सर्वोत्तम सिमेन्टको सेयर खरिद बिवादः धितोपत्र बोर्डपछि नेप्सेलाई समेत स्पष्टिकरण

नियामक निकाय नेपाल धितोपत्र बोर्डका अध्यक्ष भीष्मराज ढुंगानाले प्राथमिक निष्कासन हुन लागेको सर्वोत्तम सिमेन्ट कम्पनीको शेयर आचारसंहिता र कानून विपरीत हात पारेको समाचार सार्वजनिक गरेपछि मन्त्रालयले बोर्डलाई स्पष्टीकरण सोधेको छ । अध्यक्ष ढुंगानाले भित्री सूचनाका आधारमा आफ्नो छोरीको नाममा सेयर किनेर पदको दुरुपयोग गरेको समाचार प्रकाशन भएपछि सो समाचारका विषयमा स्पष्ट पार्न तीन दिनको समय दिएर स्पष्टीकरण सोधेको हो ।

Advertisement

धितोपत्र बजारको नियामक संस्था बोर्डका अध्यक्ष ढुंगानाले व्यक्तिगत लाभका लागि पदीय मर्यादा विपरीत काम गरेको प्रमाणसहितको समाचार सार्वजनिक गरेको थियो । उनले बुक बिल्डिङ विधि मार्फत धितोपत्र निष्कासनको तयारी गरिरहेको सर्वोत्तम सिमेन्टको ११ हजार ९९२ कित्ता शेयर छोरीको नाममा राखेको भेटिएको थियो ।

अर्थ मन्त्रालयको वित्तीय क्षेत्र व्यवस्थापन तथा संस्थान समन्वय महाशाखाले १३ साउनमा पठाएको पत्रमा विभिन्न सञ्चारमाध्यममा बोर्डसँग सम्बन्धित समाचार प्रकाशन भएकोमा मन्त्रालयको ध्यानाकर्षण भएको उल्लेख छ । पत्रमा भनिएको छ, “सञ्चारमाध्यममा आएका उक्त विषयवस्तुको सम्बन्धमा सत्य, तथ्य यथार्थता के हो, सोको स्पष्ट र तथ्यपरक विवरण तीन दिनभित्र मन्त्रालयमा उपलब्ध गराउन आदेशानुसार अनुरोध गरिएको छ ।”

उता नेपाल स्टक एक्सचेन्जका प्रमुख कार्यकारी अधिकृत चन्द्रसिंह साउदले पनि स्वार्थ बाझिने गरी श्रीमतीको नाममा उक्त कम्पनीको शेयर राखेको देखिएको थियो । सर्वोत्तम सिमेन्टको सेयर खरिद बिवादका विषयमा अर्थमन्त्रालयले नेपाल स्टक एक्सचेञ्जलाई पनि स्पष्टीकरण सोधेको छ । नेप्सेका सीईओ चन्द्रसिंह साउदले पनि श्रीमतीको नाममा सर्वोत्तमको सेयर किनेका छन् । नेप्सेका सीईओ साउदले श्रीमतीको नाममा सेयर नामसारी भएको भेटिए पछि इन्साइडर ट्रेडिङ भएको भन्दै कारबाहीको हुनुपर्ने आवाज उठेको छ ।

मन्त्रालयको वित्तीय क्षेत्र व्यवस्थापन तथा संस्थान समन्वय महाखाशाले तीन दिनको समय सीमा नै तोकेर स्पष्टीकरण सोधे पनि बोर्ड अध्यक्ष तथा सीईओ साउदको नाम भने तोकेको छैन ।