May 22, 2022, Sunday
८ जेष्ठ २०७९, आईतवार

बुटवलमा आज एकै दिन तीन कोरोना सङ्क्रमितको मृत्यु

बुटवलमा आज एकै दिन तीन कोरोना सङ्क्रमितको मृत्यु

एजेन्सी । बुटवलमा एकै दिन आज तीन कोरोना सङ्क्रमितको मृत्यु भएको छ । अस्पतालमा कोरोना सङ्क्रमितको उपचारका लागि सघन उपचार कक्षको अभाव हुँदा एक सङ्क्रमितको भने उपचारका लागि बुटवल बाहिर लैजाँदै गर्दा बाटामा मृत्यु भएको छ । उपचारका लागि सघन उपचार कक्ष नपाइएपछि बुटवलका सङ्क्रमितलाई दाङको बेलझुण्डीस्थित कोरोना विशेष अस्पतालमा लैजाँदै गर्दा बाटैमा मृत्यु भएको हो ।

Advertisement

बुटवल–११ का ८४ वर्षीय पुरुषको उपचारका लागि लैजाने क्रममा कपिलवस्तुको धानखोलामा मृत्यु भएको लुम्बिनी प्रादेशिक अस्पतालका सूचना अधिकारी डा.विष्णु गौतमले आज जारी गरेको विज्ञप्तिमा जनाइएको छ । उनी लामो समयदेखि मुटु रोगको समस्याले पीडित रहेको जनाइएको छ ।

Advertisement

त्यस्तै कोरोना सङ्क्रमित बुटवल–११ की ६१ वर्षीया महिलाको उपचारका क्रममा आज बिहान करिब २ बजे कोरोना विशेष अस्पताल बुटवलमा मृत्यु भएको हो । बुधबार कोरोना विशेष अस्पतालको कक्षमा भर्ना भएकी सङ्क्रमित महिलाको उपचारका क्रममा मृत्यु भएको जनाइएको छ । श्वासप्रश्वासको समस्या देखिएपछि भेन्टिलेटरमा राखेर उपचार गर्दागर्दै उनको मृत्यु भएको अस्पतालले जनाएको छ ।

त्यस्तै बुटवल–१ का अर्का ७० वर्षीय पुरुषको गएराति १० बजे कोरोना विशेष अस्पतालको सघन उपचार कक्षमा उपचारका क्रममा मृत्यु भएको छ । शनिबार अस्पताल भर्ना भएका उनमा यही असोज २२ गते कोरोना सङ्क्रमण पुष्टि भएको थियो । रासस ।