तानसेनमा माघ २० गतेदेखि फुड फेस्टिवल आयोजना हुने
पाल्पाको पर्यटकीय नगरी तानसेन नगरपालिका –४ मखनटोलको आयोजनामा माघ २० गते फूड फेस्टिवल हुने भएको छ । संयोजक प्रविता शाक्यले तानसेनको व्यापारमा केही राहत मिलोस् भन्ने उद्देश्यले फेष्टिबल आयोजना गर्न लागिएको हो ।
शाक्यले कोरोना महामारीपछि गति लिन थालेको पाल्पाको पर्यटनलाई पुरानै अवस्थामा फर्काउन फेस्टिवल आयोजना गरिएको बताए । यो संस्करणको मुख्य आकर्षणमा विभिन्न जातजाति, आमा समूह लगायत अन्य संघ संस्थाको पोशाक तथा कला प्रदर्शन, राष्ट्रिय तथा स्थानीय कलाकारको प्रस्तुति रहने तानसेन नगरपालिकाका प्रवक्ता यादवसिंह कार्कीले बताएका छन् ।
फेस्टिवलमा स्थानीय, स्वदेशी तथा विदेशी खानाको परिकार राखिने आयोजकले जनाएको छ । फेस्टिवल स्थानीय कला, संस्कृति, भेसभूषाको जगेर्नामा केन्द्रित रहने बताइएको छ ।
फेस्टिवलमा विभिन्न जातजातिको खानाका परिकारको ७० स्टल राखिने तानसेन नगरपालिका –४ का अध्यक्ष हेमन्तराज शाक्यले जानकारी दिएका छन् । एक स्टलको १५ सय रुपियाँ शुल्क लाग्नेछ । सडक किनारमा पर्यटक बसेर परिकारमा रमाउने व्यवस्था गरिने आयोजकको भनाइ छ ।
फेस्टिवलमा ८ हजारसम्म दर्शक आउने र ३० लाख रुपियाँभन्दा बढीको कारोवार हुने आयोजकको अनुमान रहेको मखनटोल विकास संस्थाका सचिव ज्ञानु कार्कीले जानकारी दिनुभयो । मखन टोल विकास संस्था र तानपा –४ को आयोजना तथा तानसेन नगरपालिकाको सहयोगमा फेस्टिवल सम्पन्न गर्न तीन लाख रुपियाँभन्दा बढी खर्च लाग्ने कार्कीले जानकारी दिएका छन् ।
प्रतिकृया दिनुहोस्