आलम नख्खु जेलमा

वाणिज्य न्युज
३० कार्तिक २०७६

शनिवार ३० कात्तिक २०७६
नेपाली बब्बरसिंहको उपमा पाएका सांसद, पूर्वमन्त्री एवं कांग्रेस नेता महोम्मद अफताब आलमलाई रौटहटबाट ललितपुरको जेलमा ल्याइएको छ । रौतहटको राजापुर बमकाण्डका मुख्य आरोपी आलमलाई काठमाण्डौँ ल्याइएको छ । जिल्ला अदालत रौतहटले थुनामा राख्न हिजो आदेश दिएपछि सुरक्षाको कारण देखाउदै आलमलाई गएराति काठमाण्डौ ल्याइएको हो । उनलाई ललितपुरस्थित नख्खु कारागारमा राखिएको प्रहरी स्रोतले जनाएको छ ।

आफैले बनाउन लगाएको बम विस्फोट हुँदा घाइते भएका युवाहरूलाई जिउँदै इँटाभट्टामा हाल्ने मोहम्मद अफ्ताब आलमको आतंक कुन हदसम्म छ ? १२ वर्षपछि उनलाई जेल पठाउने न्यायाधीशको मनस्थितिले पनि यो बयान गर्छ । पुर्पक्षका लागि आलमलाई जेल पठाउने न्यायाधीश दीपक ढकालले रौतहटबाट आफूलाई तत्काल सरुवा गर्न न्यायपरिषद्लाई आग्रह गरेका छन् । आदेश दिएलगत्तै शुक्रबार साँझ नै उनले जिल्ला छाडेका छन् । आलमविरुद्ध बहस गर्ने जिल्ला न्यायाधिवक्ता (सरकारी वकिल) फणीन्द्रराज कटवाल पनि सरुवाको माग गर्दै शुक्रबार नै रौतहटबाट हिँडेका छन् ।

अदालतमा बहस चल्दै गर्दा जाहेरवाला र साक्षीलाई धम्की दिने, बन्धक बनाउने र बयान फेर्न लगाउने आलमले न्यायाधिवक्ता र न्यायाधीशलाई समेत विभिन्न माध्यमबाट त्रासमा पारेका थिए । अदालत स्रोतका अनुसार असुरक्षित महसुस गरेर नै उनीहरूले जिल्ला छाडेका हुन् ।

जघन्य अपराध गरेर पनि १२ वर्षसम्म कहिले सांसद र कहिले मन्त्रीका रूपमा निस्फिक्री घुम्दै आएका आलमले पक्राउ हुने वेला प्रहरीलाई नै धम्क्याएका थिए । उनले सुरुमा पक्राउ पुर्जीसमेत लिन मानेका थिएनन् । तर, प्रहरीले जनकपुरबाट समेत थप फौज मगाएर आलमलाई पक्राउ गरेको थियो ।