January 21, 2022, Friday
७ माघ २०७८, शुक्रबार

दलहरु नयाँ सरकार गठनको कसरतमा

दलहरु नयाँ सरकार गठनको कसरतमा

राष्ट्रपति बिद्यादेवी भण्डारीले नयाँ सरकार गठनका लागि दिएको समयसीमाभित्र सरकार गठनको प्रयास दलहरुले सुरु गरेका छन् । त्यसका लागि सरकारबाहिर रहेका दलहरुले बिहानैबाट प्रयास थालेका हुन् ।

Advertisement

प्रमुख प्रतिपक्ष नेपाली काँग्रेसले बिहान आन्तरिक छलफल गर्ने र त्यसपछि द्विपक्षीय तथा सामुहिक छलफल अघि बढाउने जनाएको छ । काँग्रेस सहमहामन्त्री डा. प्रकाशशरण महतले पदाधिकारी बैठकमा पार्टीको धारणा तय गरी अन्य दलहरुसँग छलफल गर्ने बताए ।
माओवादी केन्द्रले पनि शीर्ष नेताहरुको अनौपचारिक छलफल सुरु गरेको छ । दिउँसो अध्यक्ष पुष्पकमल दाहालले काँग्रेस सभापति शेरबहादुर देउवा तथा अन्य दलका नेताहरुसँग छलफल गर्ने कार्यक्रम तय भएको छ ।

Advertisement


जनता समाजवादी पार्टी जसपाको ठाकुर–महतो पक्ष प्रधानमन्त्रीसँग नजिक रहेकाले उपेन्द्र यादव–बाबुराम भट्टराई पक्षले विकल्पका बिषयमा छलफल थालेको छ । यसअघि आफ्नै नेतृत्वमा सरकार गठन गर्ने निर्णय गरेको जसपाले पार्टी अध्यक्ष महन्थ ठाकुरलाई वैकल्पिक प्रधानमन्त्रीका रुपमा अघि सार्ने तयारी गरेको छ । नयाँ सरकारबारे निर्णय गर्न जसपाको ठाकुर महतो समुहले संसदीय दलको बैठक बोलाएको छ ।

यसअघि दलहरुले बहुमतीय सरकार गठन गर्न नसकेपछि ठुलो दलको हैसियतमा प्रधानमन्त्री केपी शर्मा ओलीलाई नै नयाँ प्रधानमन्त्री नियुक्त गरिएको थियो । तर नियुक्तीपछि ३० दिनभित्र संसदबाट विश्वासको मत लिनुपर्नेमा प्रधानमन्त्री ओलीले त्यसो नगरी संविधानको धारा ७६ (५) बमोजिम सरकार गठन गर्न राष्ट्रपति समक्ष सिफारिस गरेका थिए । राष्ट्रपति भण्डारीले दिएको समयसीमा आज साँझ ५ बजे सकिदैछ ।