नेपालको आर्थिक वृद्धिदर ६.४ प्रतिशत रहने विश्व बैंकको अनुमान

वाणिज्य न्युज
२०७६ मंसिर २६, बिहीबार ०९:१३ गते

मङ्सिर २६ काठमाडौं
विश्व बैंकले चालू आर्थिक वर्षमा नेपालको आर्थिक वृद्धिदर ६.४ प्रतिशत रहने नया प्रक्षेपण गरेको छ । विश्व बैंकले बिहीबार ‘नेपाल डेभपलमेन्ट अपडेट’ सार्वजनिक गर्दै सो कुरा जनाएको हो । यसअघि बैंकले गरेको प्रक्षेपणमा नेपालको आर्थिक वृद्धिदर ६.५ प्रतिशत रहने देखाइएको थियो । बैंकले नेपालले भ्रमण वर्ष सन् २०२० को प्रचार प्रसार पर्याप्त मात्रामा गरेको र त्यसका लागि पूर्वाधारमा पनि ठ्रलो लगानी गरेको हुँदा सेवा क्षेत्र बढ्ने बताएको हो । बैकका अनुसार चालू आर्थिक वर्षमा नेपालको कृषि क्षेत्रका वृद्धिदर ४ प्रतिशत, औद्योगिक क्षेत्रका वृद्धिदर ८.३ प्रतिशत र सेवा क्षेत्रका वृद्धिदर ७.२ प्रतिशत रहने छ । बैंकले भ्रमण वर्षका लागि नेपालले दोस्रो अन्तर्रा्ष्ट्रिय विमानस्थल सम्पन्न गर्ने र विभिन्न मुलुकसँगका हवाई सेवा सम्झौतापछि ‘एयर कनेक्टिभिटी’ बढ्ने लगायतका आधारमा सेवा क्षेत्रका विस्तार हुने जनाएको छ । बैंकका वरिष्ठ अर्थशास्त्री केन इमेजनरीले यस वर्ष नेपालको चालू खाता घाटा कूल गार्हस्थ्य उत्पादन (जीडीपी) ६.८ प्रतिशतमा झरे पनि वित्त घाटा भने बढेर जीडीपीको २.६ प्रतिशत पुग्ने बताए । उनले चालू आर्थिक वर्षमा मूल्यवृद्धि पनि पाँच प्रतिशत नाघ्ने जनाएका छन् ।
कार्यक्रममा अर्थमन्त्री डा. युवराज खतिवडाले नेपालका वृद्धिदर कम आँकलन गरिएकोमा असन्तुष्टि जनाएका छन् । उनले बैंकले आफ्ना वृद्धि प्रक्षेपणमा पुनरावलोकन गरिरहेको भन्दै आउँदा दिनमा नेपालका वृद्धि प्रक्षेपण बढाउन आग्रह गरे । “हाम्रो लक्ष्य ८ प्रतिशत आर्थिक वृद्धि गर्ने हो । अहिले नै आत्तिएर आर्थिक वृद्धिको लक्ष्य परिवर्तन गर्ने बेला भएको छैन ।” उनले अगाडि थपे ।