जुडोकी सोनिया ओलम्पिकमा पहिलो चरणबाटै बाहिरिन

वाणिज्य न्युज
९ श्रावण २०७८

जापानको राजधानी टोकियोमा भइरहेको ३२ औँ ग्रीष्मकालीन ओलम्पिक खेलकूदमा नेपाली जुडो खेलाडी सोनिया भट्टले टोकियो ओलम्पिकको पहिलो खेलमै पराजय बेहोरेकी छन् । सोनिया रुसकी डोल्गोभा इरिनासँग पराजित भएकी हुन् । शनिबार राउन्ड अफ ३२ अन्तर्गत ४८ केजी मुनिको तौल समूहमा उनले १ मिनेट १६ सेकेन्डमै खेल गुमाइन् ।

विश्व वरियताको नवौँ स्थानमा रहेकी इरिनाले इप्पोनका आधारमा सोनियामाथि सहज जित दर्ता गरेकी हुन् । इरिनाले फाइनल प्रवेश गरेको खण्डमा सोनियाले रेपेचेजमार्फत पुन ःप्रतिस्पर्धा गर्ने मौका पाउनेछिन् । सोनियाले वाइल्ड कार्डमार्फत् ओलम्पिकमा सहभागिता जनाउने अवसर प्राप्त गरेकी हुन् ।

टोकियो ओलम्पिकमा अब पौडीका गौरिका सिंह र एलेक्स शाह, एथलेटिक्सकी सरस्वती चौधरीले प्रतिस्पर्धा गर्न बाँकी नै छ । सिंहले महिला १०० मिटर फ्रि स्टाइल, शाहले पुरुष १०० मिटर फ्रि स्टाइल तथा चौधरीले महिला १०० मिटर दौडमा प्रतिस्पर्धा गर्नेछन् । टोकियो ओलम्पिक यही साउन २४ गतेसम्म सञ्चालन हुनेछ ।