बोलीबन्द भएको ३४ वर्षपछि भजन शिरोमणी आचार्यले हामीबाट लिए विदा

धनकुटाको दुर्गम स्थान कुरुले तेनुपामा वि.सं. १९९९ सालमा जन्मिएका चर्चित गायक, संगीतकार भजन शिरोमणी भक्तराज आचार्य अव हामी माझ छैनन् । गीत गाउन असमर्थ भएको ३४ वर्षपछि भजन शिरोमणी आचार्य सधैंका लागि हामीबाट विदा भएका हुन । आचार्य डेढ वर्षको हुँदा बाबु बलभद्रको निधन भएपछि आमा रेनुका सहित परिवार भारतको डुवर्सतर्फ बसाइँसराइ गरेका थिए । बसाइँ सरेर गएपछि भने आचार्य जन्मस्थान पुगेका थिएनन् ।

भक्तराज आचार्यको जीवनमा एउटा यस्तो घटना घट्यो जसको उनले कल्पनासमेत गरेका थिएन् । उनलाई २०४६ सालमा एउटा बज्रपात आइलाग्यो । उनीमाथि काठमाडौंको बौद्धमा सांघातिक आक्रमण भयो । उनको त्यो चोट निको नहुँदै अर्को बज्रपात आइलाग्यो । २०५० मा उनको जिब्रो काट्नु पर्यो र त्यो घटनापछि उनको गायन यात्रामा पूर्ण बिराम नै लाग्यो । त्यो बेला नै हो नेपाली सांगीतिक क्षेत्रले एउटा बहुमूल्य प्रतिभाको आवाजलाई गुमायो र नेपाली सांगीतिक क्षेत्रमा अपूरणिय क्षति भयो ।

भजन शिरोमणी भक्तराज आचार्य केवल गायकमात्र नभएर कुशल संगीतकार पनि थिए । यी दिग्गज संगीतकर्मीले झण्डै पाँच सय सय गीतमा आवाज दिएका थिए ।
भक्तराज आचार्य गायकमात्रै होइन कुशल संगीतकार पनि थिए । मुटु जलिरहेछ, जति चोट दिन्छौँ, हजार सपना, माया मेरी साँझ बनी, जीवन भन्नु त घात छ, यहाँ जिन्दगीले लगायत झण्डै पाँच सय गीतमा आवाज दिएका संगीतकर्मी आचार्यको निधनमा यतिबेला सांगीतिक क्षेत्र शोकाकूल बनेको छ ।

तन मन वचनले, प्रभु नामसहित दर्जनौं लोकप्रिय भजनहरु गाएर भजन शिरोमणीको उपाधि प्राप्त गरेका आचार्यका आधुनिक गीत पनि उत्तिकै लोकप्रिय रहेका छन् । आधुनिक शैलीका गीत र भजनबाट उनलाई विभिन्न पुरस्कार र सम्मानबाट सम्मानित गरिएको थियो ।

उनको सबै भन्दा ठूलो सम्मान भनेकै भजन शिरोमणीको उपाधि प्राप्त गर्नु हो । उनलाई पद्मश्री पुरस्कारबाट पनि पुरस्कृत गरिएको थियो । त्यस्तै उनले गोरखा दक्षिण बाहु पदकबाट पनि सम्मानित गरिएको थियो । गोरखा दक्षिणबाहु, त्रिशक्ति पट्ट (पहिलो), विरेन्द्र–ऐश्वर्या सेवा पदक, राष्ट्रिय प्रतिभा पुरस्कार, छिन्नलता पुरस्कार, राष्ट्रिय संगीत सम्मान २०७५ संगै विभिन्न समारोहहरुमा लाईफटाइम अचिभमेन्ट अवार्डबाट सम्मानित हुन सफल थिए ।

आचार्यको जीवनीमाथि ‘आचार्य’ नामक नेपाली फिल्म नै बनेको छ, जसमा भक्तराज आचार्यको जीवनका हरेक उतार–चढावको बारेमा देखाइएको छ । उक्त फिल्ममा सत्यराज आचार्यले नै भक्तराज आचार्यको भूमिका निर्वाह गरेका छन् । उनले नेपाली सांगीतिक क्षेत्रलाई सत्यराज–स्वरूपराज आचार्य जस्ता गायक छोरा उत्तराधिकारीको रूपमा दिएका छन् । सामाजिक सञ्जालमा भजन शिरोमणि आचार्यप्रति भाव पूर्ण श्रद्धाञ्जली अर्पण गरिँदैछ । अधिकांश संगीतकर्मीहरुले उनका लोकप्रिय गीतका शब्दहरु शेयर गर्दै श्रद्धाञ्जली अर्पण गरिरहेका छन् ।