फिल्म ‘सोल्टिनी’ को नयाँ रिलिज मिति घोषणा गरिएको छ। यसअघि असोज ३ मा आउने भनिएको फिल्म अब कार्तिक ६ गते भाइटीकाको दिनदेखि प्रदर्शनमा आउने भएको हो।
प्रकाश सपुत र परीक्षा लिम्बु अभिनीत यो फिल्मको शुक्रबार एकसाथ चारवटा पोस्टर सार्वजनिक गर्दै प्रदर्शन मिति घोषणा गरिएको हो।
फिल्ममा रोचक कुरा के छ भने, कार्यकारी निर्माताको रूपमा ‘हर्क साम्पाङ रिभोलुसन एन्ड टिम’ जोडिएको छ। यस समूहको नेतृत्व धरान महानगरपालिकामा मेयर हर्क साम्पाङ रहेका छन्।
‘सोल्टिनी’ अर्जुन सुवेदीले निर्देशन गरेका हुन्। फिल्ममा प्रकाश र परीक्षाका साथमा विल्सन विक्रम राई, सब्बु गुरूङ, रवीन्द्र झा, प्रकाश घिमिरे, प्रेम सुब्बा, कविता आले, सुन्दर धिताल, सुजन खतिवडालगायतका कलाकारहरूको अभिनय छ।
चार वटा फरक–फरक पोस्टरहरूले फिल्मको कथावस्तु प्रेम, संस्कृति र ग्रामीण परिवेशमा आधारित रहेको जनाउँछन्।
एक पोस्टरमा प्रकाश र परीक्षाको रोमान्टिक केमेस्ट्रीलाई विशेष रूपमा प्रस्तुत गरिएको छ। एक पोस्टरमा अभिनेत्री परीक्षा लिम्बु परम्परागत भेषभुषा र गहनामा सजिएको देखिन्छिन्। अर्को एक पोस्टरमा ग्रामीण परिवेशमा पुल पार गर्दै हाँसिरहेका प्रकाश र परीक्षा देखिन्छन्। प्राकृतिक सौन्दर्य र गाउँको जीवनशैलीलाई प्रस्ट्याउने यो दृश्यले कथामा ग्रामीण सौन्दर्य र सरल जीवनको प्रस्तुति हुने आभास दिन्छ। एक सामूहिक पोस्टरमा प्रकाश र परीक्षासहित अन्य पात्रहरूलाई समेत समेटिएको छ। यहाँ लोकसंस्कृति, नाचगान र हास्य–मनोरञ्जनको आभास पाइन्छ।
निर्देशक सुवेदी यस फिल्मले दर्शकलाई फरक स्वादको कथासँग जोड्ने दाबी गर्छन्। समाजमा व्याप्त अमानवीयता र जातीय भेदभावका विरुद्ध फिल्मले आवाज उठाउनेछ भने दुई प्रमुख पात्रबिचको प्रेम कथा यसको मुख्य आकर्षण रहेको सुवेदीले बताए।
इलाम, झापा, भोजपुरका लगायतका जिल्लामा छायांकन गरिएको फिल्म सुशन प्रजापतिले खिचेका हुन्। फिल्म अर्जुन सुवेदी र कुमार भट्टराईले लेखेका छन्।
प्लानेट थ्री फिल्म्स र योलो इन्टरटेन्मेन्टको सहकार्यमा बनेको फिल्मको निर्माताहरू रेजिना बिस्ट र संसार चौलागाईँ हुन् भने रोशन चौलागाईँ, वसन्त कटुवाल र सुजन अधिकारी सह-निर्माताहरू हुन्। रोयल भीमसेन र ट्राइडेन्ट कन्सेप्टले पोस्टर तथा पब्लिसिटी डिजाइन गरेका छन् भने टि फल्क्स फिल्मस्ले नेपालमा वितरण गर्नेछ।
