चालु आर्थिक वर्षको पहिलो ११ महिना (साउन-जेठ) मा वाणिज्य बैंकहरूले शेयर धितो कर्जा (शेयर लोन) प्रवाहमा अभूतपूर्व वृद्धि हासिल गरेका छन्। नेपाल राष्ट्र बैंकले हालै सार्वजनिक गरेको तथ्यांकअनुसार, देशमा सञ्चालनमा रहेका २० वटा वाणिज्य बैंकमध्ये १९ वटाले जेठ मसान्तसम्म कुल १ खर्ब ६ अर्ब १८ करोड ६४ लाख रुपैयाँ बराबरको शेयर धितो कर्जा लगानी गरेका छन्।
यो तथ्यांकले गत आर्थिक वर्षको सोही अवधिको ६८ अर्ब ६२ करोड ४४ लाख रुपैयाँको तुलनामा ५४.७४ प्रतिशतको उल्लेखनीय वृद्धि देखाउँछ, जुन नेपाली पूँजीबजारमा बढ्दो आकर्षणको संकेत हो। यस अवधिमा स्ट्यान्डर्ड चार्टर्ड बैंकबाहेक अन्य सबै वाणिज्य बैंकहरूले शेयर धितो कर्जा प्रवाह गरेका छन्, जहाँ १८ वटा बैंकको कर्जा प्रवाह बढेको छ भने एउटाको भने घटेको छ।
चालु आर्थिक वर्षको जेठसम्म नबिल बैंक शेयर धितो कर्जा प्रवाहमा शीर्ष स्थानमा रहेको छ, जसले १५ अर्ब ७ करोड ७६ लाख रुपैयाँ कर्जा प्रवाह गरेको छ। यो अघिल्लो वर्षको ११ अर्ब ४२ करोड ७२ लाख रुपैयाँको तुलनामा ३१.९५ प्रतिशतले बढी हो। दोस्रोमा ग्लोबल आइएमई बैंक रहेको छ, जसले ११ अर्ब ६० करोड २७ लाख रुपैयाँ शेयर लोन प्रवाह गरेको छ, जुन अघिल्लो वर्षको ७ अर्ब ९ करोड ५५ लाख रुपैयाँभन्दा ६३.५२ प्रतिशतले बढी हो। तेस्रो स्थानमा कुमारी बैंक रहेको छ, जसले ९ अर्ब ४७ करोड ८९ लाख रुपैयाँ शेयर लोन प्रवाह गरेको छ। यस बैंकको कर्जा प्रवाहमा अघिल्लो वर्षको ४ अर्ब १५ करोड ४९ लाख रुपैयाँको तुलनामा १२८.१४ प्रतिशतको आश्चर्यजनक वृद्धि देखिएको छ।
यसबाहेक, सिद्धार्थ बैंकले ८ अर्ब ४१ करोड ४१ लाख रुपैयाँ, प्राइम कमर्सियल बैंकले ८ अर्ब १६ करोड ८४ लाख रुपैयाँ, नेपाल बैंकले ७ अर्ब ७२ करोड ७४ लाख रुपैयाँ, सिटिजन्स बैंकले ६ अर्ब ८५ करोड १७ लाख रुपैयाँ, लक्ष्मी सनराइज बैंकले ६ अर्ब १६ करोड ९५ लाख रुपैयाँ र राष्ट्रिय वाणिज्य बैंकले ६ अर्ब ६६ लाख रुपैयाँ शेयर धितो कर्जा प्रवाह गरेका छन्। यी सबै बैंकको कर्जा प्रवाह अघिल्लो वर्षको तुलनामा बढेको छ।
त्यस्तै, प्रभु बैंकले ४ अर्ब ५२ करोड ४४ लाख रुपैयाँ, कृषि विकास बैंकले ३ अर्ब ५७ करोड ९ लाख रुपैयाँ, नेपाल इन्भेस्टमेन्ट मेगा बैंकले ३ अर्ब २८ करोड ५ लाख रुपैयाँ, सानिमा बैंकले ३ अर्ब १ करोड ६९ लाख रुपैयाँ र एभरेस्ट बैंकले २ अर्ब ८२ करोड ७१ लाख रुपैयाँ शेयर लोन प्रवाह गरेका छन्, जसको कर्जा प्रवाहमा पनि अघिल्लो वर्षको तुलनामा वृद्धि भएको छ।
हिमालयन बैंकले २ अर्ब ४४ करोड ६२ लाख रुपैयाँ, माछापुच्छ्रे बैंकले २ अर्ब २९ करोड ७१ लाख रुपैयाँ, एनआईसी एसिया बैंकले २ अर्ब ९ करोड ६९ लाख रुपैयाँ, एनएमबि बैंकले २ अर्ब २० लाख रुपैयाँ र नेपाल एसबीआई बैंकले ६१ करोड ६७ लाख रुपैयाँ शेयर धितो कर्जा प्रवाह गरेका छन्। यस अवधिमा एनआईसी एसिया बैंकको कर्जा प्रवाहमा भने कमी आएको छ भने अन्य बैंकहरूको बढेको छ।
