यही साउन २१ गतेबाट काठमाडौंको भृकुटीमण्डपमा आयोजना हुन गइरहेको नाइमा नेपाल मोबिलिटी एक्स्पोमा विभिन्न ब्राण्डले दर्जन बढी नयाँ मोडल सार्वजनिक गर्ने तयारी थालेका छन् ।
करिब ५० स्टल रहने मोबिलिटी एक्स्पोमा चार पाङ्ग्रे ब्राण्डहरूको उल्लेखनीय सहभागिता रहनेछ । अहिलेसम्म कम्पनीहरूले दिएको जानकारी अनुसार करिब एक दर्जन नयाँ मोडल सार्वजनिक हुनेछन् ।
मोलिलिटी एक्स्पोमा ओमोडा/जेको ब्राण्डका दुई एसयूभी बिक्री सुरू हुनेछन् । एसपीजी अटोमोबाइल्स कम्पनीले अटो एक्स्पोमा जेको जे-फाइभ र भी-ट्वान्टीथ्री मोडल सार्वजनिक गर्नेछ । यी दुवै मोडल नेपाली बजारको लागि विल्कुलै नयाँ हुने छन् ।
एमजीको आधिकारिक बिक्रेता पारामाउन्ट मोटर्सले अटो एक्स्पोमा आइएम-सिक्स मोडल सार्वजनिक गर्नेछ । आइएम मोटर्सको उत्पादन नेपालमा एमजीकै शोरुममार्फत बिक्री हुनेछ । यसका अलावा पारामाउन्ट मोटर्सले माज्दाको नयाँ एसयूभी पनि अटो एक्स्पोमा देखाउने छ । त्यसको डिटेल भने बाहिर ल्याएको छैन ।
लक्ष्मी प्रिमियमले नयाँ ब्राण्ड फरथिङ लन्च गर्ने जनाएको छ । कम्पनीका अनुसार फरथिङ फ्राइडे मोडल अटो एक्स्पोमार्फत बजार प्रवेश गर्नेछ । लक्ष्मी ग्रुप अन्तर्गतकै हुन्डाईले के नयाँ देखाउँछ, अहिलेसम्म बाहिर ल्याएको छैन ।
बीवाइडीको आधिकारिक बिक्रेता साइमेक्स इंकले पनि नाइमा मोबिलिटी एक्स्पो मार्फत नै सिलायन-सेभेनको बिक्री थाल्ने छ । अहिले ब्लाइन्ड बुकिङ चलिरहेको सिलायन-सेभेन एक्स्पोको लागि बीवाइडीको विल्कुलै नयाँ मोडल हो ।
महिन्द्राले एक साथ दुई इलेक्ट्रीक एसयूभी सार्वजनिक गर्दैछ । आधिकारिक बिक्रेता अग्नी इनकर्पोरेट प्रालिले बीई-सिक्स र एक्सईभी-नाइन ई मोडल बजारमा उतार्न लागेको हो ।
फक्सवागेनको आधिकारिक बिक्रेता पूजा इन्टरनेशनल नेपालले पनि नयाँ सेडान कार सार्वजनिक गर्दैछ । कम्पनीले भारतमा उत्पादन र बिक्री हुँदै आएको भर्टुस सेडान बिक्री थाल्न लागेको हो ।
प्रोटोनको आधिकारिक बिक्रेता जगदम्बा मोटर्सले पनि इमास-फाइभ ल्याउने प्रयास गरिरहेको छ । कम्पनीले सकेसम्म इमास-फाइभ ह्याचब्याक अटो एक्स्पोबाट प्रिमियर गर्ने योजना बनाएको हो ।
नेक्सन भेन्चर प्रालिले पनि एलईभी ब्राण्डको ह्याचब्याक कार नाइमा मोबिलिटी एक्स्पो मार्फत बिक्री थाल्दैछ । कम्पनीले ल्याउने एलईभी-०५ मोडलले बजारमा राम्रै प्रभाव पार्ने कम्पनीको दाबी छ । साथै, नेक्सन भेन्चरले एलईभी-०१ को अलह्वील ड्राइभ भर्सन एलईभी एक्स पनि अटो एक्स्पोमार्फत बिक्री थाल्दैछ ।
अहिले नेपालका सबै किसिमका सडकमा यसको परीक्षण भइरहेको कम्पनीले जनाएको छ । करिब १० हजार किलोमिटर परीक्षणपछि अटो एक्स्पो मार्फत बिक्री थाल्ने तयारी भइरहेको कम्पनीको भनाइ छ ।
साँग्रिला मोटर्सले पनि अटो एक्स्पोमा लीपमोटरको बी-टेन एसयूभी सार्वजनिक गर्दैछ । भर्खरै युरोपमा लन्च भएको बी-टेन यसअघि कम्पनीले ल्याएको सी-टेनभन्दा कम मूल्यमा उपलब्ध हुनेछ ।
नाइमा मोबिलिटी एक्स्पोमा कियाले पनि नयाँ एसयूभी ईभी-फाइभ देखाउने तयारी गरिरहेको छ । अहिले एक युनिट ईभी-फाइभ भन्सार बिन्दुमा आइपुगेको छ । त्यसैलाई ल्याएर एक्स्पो मार्फत सार्वजनिक गर्ने कन्टिनेन्टल ट्रेडिङले योजना बनाएको हो ।
