उद्योग, वाणिज्य तथा आपूर्ति मन्त्रालयले विशेष आर्थिक क्षेत्र (सेज) प्राधिकरणको कार्यकारी निर्देशक पदमा खुला प्रतिस्पर्धामार्फत नियुक्ति प्रक्रिया अघि बढाएको छ। यसका लागि आवश्यक योग्यता पुगेका नेपाली नागरिकबाट आवेदन माग गरिएको मन्त्रालयले जनाएको छ।
विशेष आर्थिक क्षेत्र ऐन, २०७३ मा भएको व्यवस्थाअनुसार पदपूर्ति गर्न लागिएको हो। मन्त्रालयले जारी गरेको सूचनाअनुसार योग्य उम्मेदवारले तोकिएको समयसीमाभित्र आवश्यक कागजातसहित आवेदन दर्ता गर्न सक्नेछन्।
कार्यकारी निर्देशक बन्न इच्छुक उम्मेदवारले मान्यता प्राप्त शैक्षिक संस्थाबाट व्यवस्थापन, अर्थशास्त्र, इन्जिनियरिङ वा कानुन विषयमध्ये कुनै एकमा कम्तीमा स्नातकोत्तर तह उत्तीर्ण गरेको हुनुपर्नेछ। शैक्षिक योग्यतासँगै उद्योग, वाणिज्य, व्यापार, राजस्व प्रशासन, इन्जिनियरिङ वा व्यवस्थापन क्षेत्रमा कम्तीमा १० वर्षको व्यावसायिक अनुभव भएको हुनुपर्ने व्यवस्था गरिएको छ।
उमेरको हकमा आवेदन दिने अन्तिम दिनसम्म उम्मेदवारले न्यूनतम ३५ वर्ष पूरा गरेको र अधिकतम ६५ वर्ष ननाघेको हुनुपर्ने मापदण्ड तोकिएको छ। योग्यता पुगेका व्यक्तिले मात्र प्रतिस्पर्धामा सहभागी हुन पाउनेछन्।
मन्त्रालयले नैतिक आचरण र पारदर्शितालाई विशेष प्राथमिकता दिँदै केही व्यक्तिलाई यस पदका लागि अयोग्य ठहर गरेको छ। भ्रष्टाचार, सम्पत्ति शुद्धीकरण वा नैतिक पतन देखिने अन्य फौजदारी कसुरमा सजाय पाएका व्यक्ति आवेदन दिन पाउने छैनन्। त्यसैगरी बैंक तथा वित्तीय संस्थाको ऋण नतिरी कालोसूचीमा परेका वा कुनै विदेशी मुलुकको स्थायी आवासीय अनुमति (पीआर) प्राप्त गरेका नेपाली नागरिक पनि यस प्रक्रियामा सहभागी हुन अयोग्य मानिनेछन्।
यसका अतिरिक्त उम्मेदवारले आफू कुनै राजनीतिक दलको सदस्य नरहेको तथा विशेष आर्थिक क्षेत्र प्राधिकरणसँग आफ्नो कुनै प्रकारको स्वार्थको द्वन्द्व नरहेको स्वघोषणा पनि आवेदनसँगै पेस गर्नुपर्नेछ।
आवेदन प्रक्रियाको महत्वपूर्ण पक्षका रूपमा उम्मेदवारले आफ्नो व्यावसायिक कार्ययोजना तयार गर्नुपर्ने व्यवस्था गरिएको छ। उक्त कार्ययोजनामा विशेष आर्थिक क्षेत्रको राष्ट्रिय तथा अन्तर्राष्ट्रिय अभ्यास, नेपालमा यसको आवश्यकता, सम्भावना, चुनौती तथा प्राधिकरणलाई प्रभावकारी रूपमा सञ्चालन गर्ने रणनीति समेटिएको हुनुपर्नेछ। कार्ययोजना २ हजार ५०० देखि ५ हजार शब्दको सीमाभित्र नेपाली वा अंग्रेजी भाषामा तयार गरी सिलबन्दी खाममा बुझाउनुपर्नेछ।
आवेदन पहिलोपटक सूचना प्रकाशित भएको मितिबाट २१ दिनभित्र उद्योग, वाणिज्य तथा आपूर्ति मन्त्रालय, सिंहदरबारस्थित सिफारिस समितिको सचिवालयमा दर्ता गरिसक्नुपर्नेछ। सूचनाअनुसार अन्तिम मिति साउन ९ गतेसम्म कायम गरिएको छ।
आवेदनसँगै शैक्षिक योग्यताको प्रमाणपत्र, अनुभव खुल्ने कागजात, नेपाली नागरिकताको प्रतिलिपि, हालसालै खिचिएको पासपोर्ट साइजको फोटो तथा विस्तृत वैयक्तिक विवरण (बायोडाटा) अनिवार्य रूपमा संलग्न गर्नुपर्नेछ। साथै, दरखास्त दस्तुरबापत ५ हजार रुपैयाँ राजस्व खातामा जम्मा गरेको सक्कल भौचर पनि पेस गर्नुपर्नेछ।
मन्त्रालयले आवेदन फाराम, विस्तृत योग्यता, कार्यविवरण तथा अन्य आवश्यक जानकारी आफ्नो आधिकारिक वेबसाइटमार्फत उपलब्ध गराएको जनाएको छ।
