नेपालको सबैभन्दा ठूलो रिटेलचेन भाटभटेनी सुपर मार्केट एण्ड डिपार्टमेन्टल स्टोरले ‘ग्लोबल बीबीएसएम क्लब कार्ड’ सार्वजनिक गरेको छ । स्टोरले ग्लोबल आईएमई बैंक लिमिटेडसँगको साझेदारीमा उक्त क्लब कार्ड सार्वजनिक गरेको हो ।
यो क्रेडिट कार्ड भाटभटेनीका ग्राहकहरूलाई अझ सहज र सुविधाजनक किनमेल अनुभव प्रदान गर्ने उद्देश्यले ल्याइएको हो । यस सुविधामार्फत योग्य ग्राहकहरूले इलेक्ट्रोनिक्स सामानहरू खरिद गर्दा तत्काल भुक्तानीको दबाबबिना सहज रूपमा किनमेल गर्न सक्नेछन् ।
प्रारम्भिक चरणमा यो योजना इलेक्ट्रोनिक्स खरिदमा लागू हुनेछ, जहाँ रु. १५,००० वा सो भन्दामाथिको खरिद रकमलाई कुनै अतिरिक्त ब्याज वा अग्रिम भुक्तानी बिना ३, ६, ९, १२ वा १८ महिनासम्मको किस्ताबन्दी (ईएमआई) सुविधामा रूपान्तरण गर्न सकिनेछ ।
‘ग्लोबल बीबीएसएम क्लब कार्ड’अन्तर्गत योग्य ग्राहकहरूले आफ्नो किनमेल इतिहास, लोयल्टी सदस्यता विवरण, केवाईसी प्रमाणीकरण तथा ग्लोबल आईएमई बैंकको मूल्यांकन प्रक्रियाका आधारमा रु. १,५०,००० देखि रु. ३,००,००० सम्मको पूर्व–स्वीकृत क्रेडिट सीमा प्राप्त गर्न सक्नेछन् ।
यसका साथै, ग्राहकहरूले ईएमआईमार्फत खरिद गर्दा विभिन्न विशेष छुट तथा आकर्षक अफरहरूको लाभ लिन सक्नेछन्, जसले दैनिक आवश्यकतादेखि उच्च मूल्यका वस्तुसम्मको खरिदलाई अझ सहज र पहुँचयोग्य बनाउनेछ ।
यो सुविधा भाटभटेनीका देशभर रहेका स्टोरहरूमा उपलब्ध हुनेछ । यसमार्फत ग्राहकहरूले भाटभटेनीको व्यापक रिटेल सञ्जालसँगै ग्लोबल आईएमई बैंकको आधुनिक बैंकिङ तथा डिजिटल भुक्तानी सेवाको सहज अनुभव प्राप्त गर्न सक्ने बताइएको छ ।
