ऊर्जा, जलस्रोत तथा सिँचाइ मन्त्रालय आगामी आर्थिक वर्षको बजेट प्रभावकारी रूपमा कार्यान्वयन गर्न विस्तृत कार्ययोजना निर्माणमा सक्रिय भएको छ। यसै सन्दर्भमा मन्त्री विराजभक्त श्रेष्ठले नेपाल विद्युत् प्राधिकरणलाई स्पष्ट योजना बनाएर तुरुन्त कार्यान्वयनमा जुट्न निर्देशन दिएका छन्।
प्राधिकरणमा आयोजित छलफल कार्यक्रममा बोल्दै मन्त्री श्रेष्ठले आगामी बजेटमा समेटिएका आयोजना तथा कार्यक्रमहरू तोकिएको समयसीमाभित्र सम्पन्न गर्नुपर्नेमा विशेष जोड दिए। उनले कार्यान्वयन प्रक्रियामा देखिने नीतिगत तथा प्रशासनिक अवरोधहरू समाधान गर्न मन्त्रालयले आवश्यक पहल गर्ने प्रतिबद्धता जनाए। तर, योजनाहरूको सफल कार्यान्वयनको नेतृत्व भने प्राधिकरणकै व्यवस्थापनले लिनुपर्ने उनको स्पष्ट धारणा थियो।
सरकारले आगामी आर्थिक वर्षका लागि प्रसारण लाइन, सबस्टेशन लगायतका पूर्वाधार निर्माणलाई प्राथमिकतामा राख्दै पर्याप्त बजेट विनियोजन गरेको उल्लेख गर्दै मन्त्री श्रेष्ठले ती आयोजना समयमै सम्पन्न गर्न ठोस कार्ययोजना आवश्यक रहेको बताए। उनले मातहतका निकायहरूलाई योजनाबद्ध रूपमा परिचालन गरी निर्धारित लक्ष्य हासिल गर्न निर्देशन दिए।
मन्त्री श्रेष्ठले प्राधिकरणका अधिकारीहरूलाई आफ्नो अनुभव, दक्षता र क्षमताको अधिकतम उपयोग गर्न आग्रह गरे। समस्याहरूको पहिचान मात्र पर्याप्त नहुने उल्लेख गर्दै उनले समाधानका ठोस प्रस्तावहरू व्यवस्थापन तहबाट आउनुपर्ने आवश्यकता औंल्याए। उनले यसपटक प्राधिकरणले माग गरेअनुसार बजेट प्राप्त गरेकोले अब त्यसको प्रभावकारी कार्यान्वयन, सेवा प्रवाहमा सुधार र गुणस्तरीय तथा दिगो विद्युत् आपूर्ति सुनिश्चित गर्ने जिम्मेवारी प्राधिकरणकै रहेको बताए।
साथै उनले प्राधिकरणले सामाजिक उत्तरदायित्वसँगै प्रतिफलमुखी लगानीमा पनि ध्यान दिनुपर्ने बताए। आगामी वर्षहरूका लागि प्राथमिकतामा राखिने आयोजनाहरूबारे स्पष्ट निष्कर्षमा पुग्नुपर्ने उनको धारणा थियो। यसले दीर्घकालीन ऊर्जा विकासमा सकारात्मक प्रभाव पार्ने अपेक्षा गरिएको छ।
छलफलका क्रममा मन्त्री श्रेष्ठले विद्युत् महसुल बक्यौता असुलीलाई पनि प्राथमिक कार्यसूचीमा राख्न सुझाव दिए। उनले यस विषयलाई निरन्तर रूपमा अघि बढाउँदै नियमित अनुगमन गरी निष्कर्षमा पुर्याउनुपर्नेमा जोड दिए।
संस्थागत सुशासन सुदृढ गर्ने, कार्यसम्पादनलाई परिणाममुखी बनाउने तथा प्राथमिकताका आयोजना छनोट गरी कार्यान्वयनमा लैजाने विषयमा उपकार्यकारी निर्देशकहरूलाई खुलेर सुझाव दिन उनले आग्रह गरे। विगतका कमजोरीहरूमा अल्झिनु भन्दा आगामी कार्यदिशामा केन्द्रित हुनुपर्ने उनको भनाइ थियो।
छलफलमा प्राधिकरणका उपकार्यकारी निर्देशकहरूले आफ्नो जिम्मेवारी क्षेत्रअन्तर्गतका आयोजना तथा कार्यक्रमहरूको प्रगति विवरण प्रस्तुत गरेका थिए। साथै आगामी कार्ययोजनाबारे जानकारी गराउँदै असार १५ गतेभित्र विस्तृत योजना तयार गरी सञ्चालक समितिमा पेश गर्ने तयारी भइरहेको बताएका छन्।
