बाँकेको नेपालगन्जमा खाना पकाउने एलपी ग्यासको अभाव देखाउँदै उपभोक्तालाई फर्काउने गरेको एक किराना पसलमा बजार अनुगमन टोलीले लुकाएर राखिएका ग्यास सिलिन्डर फेला पारेको छ। नेपालगन्ज उपमहानगरपालिका–११, त्रिभुवन चोकस्थित सदरलाइनमा रहेको शंकर दयाल बद्रीप्रसाद प्रोभिजन स्टोरमा अनुगमन गर्दा १३ वटा ग्यास सिलिन्डर लुकाएर राखिएको अवस्थामा भेटिएको हो।
उपभोक्ताले ग्यास माग्न जाँदा पसल सञ्चालकले ‘ग्यास छैन’ भन्दै फर्काउने गरेको गुनासो आएपछि प्रशासन नेतृत्वको टोलीले आइतबार उक्त पसलमा अनुगमन गरेको थियो। अनुगमनका क्रममा उपभोक्तालाई बिक्री नगरी सिलिन्डर लुकाएर राखेको पुष्टि भएपछि पसललाई ५० हजार रुपैयाँ जरिवाना गरिएको बाँकेका सहायक प्रमुख जिल्ला अधिकारी महेश कुमार गुरुङले जानकारी दिए।
गुरुङका अनुसार पछिल्लो समय ग्यासको आपूर्ति तथा बिक्री वितरणबारे विभिन्न स्थानबाट गुनासो आउन थालेपछि प्रशासनले बजार अनुगमनलाई निरन्तरता दिएको छ। सोही क्रममा उक्त पसलका विषयमा समेत उपभोक्ताबाट गुनासो प्राप्त भएको थियो।
‘उपभोक्ता आउँदा ग्यास छैन भनेर फर्काउने गरेको गुनासो हामीकहाँ आएको थियो। त्यसपछि अनुगमन गर्दा पसलमा १३ वटा ग्यास सिलिन्डर लुकाएर राखेको अवस्थामा भेटियो,’ सहायक प्रमुख जिल्ला अधिकारी गुरुङले भने।
उनका अनुसार बजारमा ग्यासको अभाव रहेको भन्दै उपभोक्तालाई बिक्री नगर्ने तर पसलभित्र सिलिन्डर लुकाएर राख्ने कार्य उपभोक्ता हितविपरीत भएकाले प्रचलित कानुन तथा व्यवस्थाअनुसार कारबाही गरिएको हो।
अनुगमनका क्रममा ग्यास सिलिन्डर लुकाएर राखिएको भेटिएपछि प्रशासनले पसल सञ्चालकलाई न्यूनतम ५० हजार रुपैयाँ जरिवाना गरेको हो। प्रशासनले बजारमा कृत्रिम अभाव सिर्जना गर्ने, उपभोक्तालाई आवश्यक वस्तु बिक्री गर्न आनाकानी गर्ने वा वस्तु लुकाएर राख्ने प्रवृत्तिमाथि निगरानी बढाएको जनाएको छ।
सहायक प्रमुख जिल्ला अधिकारी गुरुङले बजारमा अत्यावश्यक वस्तुको आपूर्ति र बिक्री वितरणलाई सहज बनाउन नियमित अनुगमन भइरहेको बताए। उनका अनुसार कुनै वस्तुको वास्तविक अभाव भए त्यसको अवस्था बुझेर व्यवस्थापन गर्न सकिने भए पनि उपलब्ध वस्तु लुकाएर उपभोक्तालाई अभाव देखाउनु स्वीकार्य हुँदैन।
‘हामी नियमित रूपमा बजार अनुगमन गरिरहेका छौँ। उपभोक्ताबाट गुनासो प्राप्त हुनेबित्तिकै सम्बन्धित स्थानमा पुगेर अवस्था हेर्ने गरेका छौँ,’ गुरुङले भने।
पछिल्लो समय ग्यासको सहज आपूर्तिलाई लिएर उपभोक्तामा चिन्ता बढिरहेका बेला बजारमा लुकाएर राखिएका सिलिन्डर फेला पर्नुले समस्या केवल आपूर्तिसँग मात्र सम्बन्धित नभई बिक्री वितरणको व्यवस्थापनसँग पनि जोडिएको देखाएको छ। उपभोक्ताले ग्यास नपाउने तर व्यवसायीको गोदाम वा पसलमै सिलिन्डर थन्किएको भेटिनुले बजार अनुगमनलाई थप प्रभावकारी बनाउनुपर्ने आवश्यकता देखिएको छ।
प्रशासनले उपभोक्ताबाट आउने गुनासोलाई अनुगमनको महत्वपूर्ण आधारका रूपमा लिएको जनाएको छ। अत्यावश्यक वस्तु लुकाउने, कृत्रिम अभाव सिर्जना गर्ने वा उपभोक्तालाई बिक्री नगर्ने व्यवसायीमाथि प्रचलित कानुनअनुसार कारबाही गरिने चेतावनीसमेत प्रशासनले दिएको छ।
आइतबार गरिएको अनुगमनमा सहायक प्रमुख जिल्ला अधिकारी गुरुङसहित प्रहरी, नेपालगन्ज उपमहानगरपालिकाका प्रतिनिधि तथा सञ्चारकर्मी सहभागी थिए। टोलीले पसलको अवस्था निरीक्षण गर्दै ग्यास सिलिन्डरको उपलब्धता तथा बिक्री वितरणबारे जानकारी लिएको थियो।
प्रशासनको पछिल्लो कारबाहीले बजारमा ग्यासलगायत अत्यावश्यक वस्तुको कृत्रिम अभाव सिर्जना गर्ने प्रयासमाथि निगरानी बढाइएको संकेत गरेको छ। उपभोक्ताले भने सहज रूपमा ग्यास पाउने वातावरण बनाउन नियमित अनुगमनसँगै दोषी भेटिए तत्काल कारबाही हुनुपर्ने अपेक्षा गरेका छन्।
