फिफा विश्वकप २०२६ को नकआउट चरणमा जापानको भिडन्त पाँच पटकको विश्वकप विजेता ब्राजिलसँग हुने पक्का भएको छ । जुन २९ मा अमेरिकाको ह्युस्टनमा हुने यो खेललाई प्रतियोगिताकै रोमाञ्चक प्रतिस्पर्धामध्ये एक मानिएको छ ।
नाम र इतिहासका हिसाबले ब्राजिल बलियो टोली भए पनि यसपटकको प्रदर्शनले जापानलाई कमजोर आँक्न नमिल्ने देखिएको छ । फुटबल विश्लेषकहरूका अनुसार, जापान अहिले अत्यन्त संगठित, अनुशासित र सन्तुलित टोलीका रूपमा मैदानमा उत्रिएको छ ।
ब्राजिलका प्रशिक्षक कार्लो एन्चेलोटी भने अझै पनि आफ्नो टोलीको उत्कृष्ट संयोजन खोज्ने प्रयासमै देखिएका छन् । समूह चरणमा मोरक्कोसँग १–१ को बराबरी खेलेको ब्राजिलले अपेक्षाअनुसार लय समात्न सकेको छैन ।
यता, जापानले ३–४–३ रणनीतिमा उत्कृष्ट प्रदर्शन गर्दै आक्रमण, मिडफिल्ड र रक्षापंक्तिमा प्रभावशाली समन्वय देखाएको छ । जापानी रक्षापंक्तिले विपक्षीलाई धेरै अवसर नदिँदा टोलीको आत्मविश्वास पनि उच्च बनेको छ ।
जापानले प्रतियोगिताभर टेक्सासलाई आधार बनाएर खेलिरहेको छ । त्यसैले, ह्युस्टनमा हुने खेलमा पनि उसले ठूलो संख्यामा समर्थकको साथ पाउने अपेक्षा गरिएको छ । ब्राजिलविरुद्धको चुनौती कठिन भए पनि जापानलाई अब कुनै पनि टोलीले सहज प्रतिद्वन्द्वीका रूपमा लिन सक्ने अवस्था देखिँदैन ।
