गएको जेठ ९ गते कोरोना पुष्टि भएका बैतडी जिल्लाका पहिलो संक्रमित युवकको दोश्रो रिपोर्ट नेगेटिभ आएसँगै कोरोनामुक्त भएका छन् । बैतडी, शिवनाथ गाउँपालिका २ का २२ वर्षीय युवकले १३ दिनमा कोरोना जितेका हुन् ।
मंगलबार र बुधबार कैलालीस्थित सेती प्रादेशिक अस्पतालको प्रयोगशालामा गरिएको पिसिआर परीक्षणमा उनको रिपोर्ट नेगेटिभ आएको थियो । बैतडीको आइसोलेसन कक्षमा उपचाररत ती युवकलाई आजै बुधबार नै डिस्चार्ज गरिएको छ ।
गत वैशाख १५ गतेदेखि किशोरी मृत्यु प्रकरणको कर्तव्य ज्यान मुद्धामा जिल्ला प्रहरी कार्यालयको हिरासतमा रहेका ती युवकमा जेठ ९ गते कोरोना पुष्टि भएको थियो । प्रहरी हिरासतमै रहेका उनको स्वाब परीक्षण गर्दा कोरोना पुष्टी भएको थियो । ती युवक गत चैत ६ गते भारतको दिल्लीबाट फर्किएका थिए ।
ती युवकले कोरोना जिते पनि आजै कारागार चलान गरिएको छ । कोरोना जितेपनि जिल्ला अदालत बैतडीले ती युवकलाई यसअघि नै पुर्पक्षका लागि कारगार चलान गर्न आदेश दिइसकेकाकोले कारागार चलान गरिएको हो ।
