काठमाडौं: एनआईसी एसिया बैंकले आफ्ना ग्राहक तथा इच्छुक लगानीकर्ताहरूका लागि लिलाम बिक्रीसम्बन्धी सम्पूर्ण जानकारी एकै ठाउँमा उपलब्ध गराउने गरी एक विशेष अनलाइन पोर्टल सञ्चालनमा ल्याएको छ। यस पोर्टलमा बैंकले लिलाम गर्न लागेका बैंकिङ्ग सम्पत्ति, गैर-बैंकिङ्ग सम्पत्ति र धितोमा रहेका सम्पत्तिहरूको विस्तृत विवरण पाउन सकिन्छ।
पोर्टलमा के-के जानकारी पाइन्छ ?
बैंकका अनुसार, यो पोर्टल खासगरी लिलाम बिक्री गरिने सम्पत्तिहरूसम्बन्धी पूर्ण जानकारीका लागि तयार पारिएको हो। यसमा निम्न जानकारीहरू उपलब्ध छन्:
- सम्पत्तिको विस्तृत विवरण: जग्गाको कित्ता नम्बर, क्षेत्रफल र अन्य आवश्यक विवरण।
- फोटो र नक्सा: सम्पत्तिको वास्तविक फोटो र नक्सा।
- गुगल म्याप: सम्पत्तिको स्थान (लोकेसन) पत्ता लगाउन गुगल म्यापको लिंक।
- थप जानकारीका लागि म्यासेज सुविधा: यदि कुनै सम्पत्तिको बारेमा थप जानकारी चाहिएमा, पोर्टलमा उपलब्ध म्यासेज बक्समा आफ्नो नाम, ईमेल, मोबाइल नम्बर र ठेगाना राखेर सोधपुछ गर्न सकिने व्यवस्था पनि गरिएको छ।
बैंकले यो पोर्टललाई नियमित रूपमा अद्यावधिक गर्ने बताएको छ, जसले गर्दा इच्छुक ग्राहकहरूले अनलाइनबाटै सहजै जानकारी प्राप्त गरी लाभ लिन सक्नेछन्। यो कदमले लिलाम बिक्री प्रक्रियालाई थप पारदर्शी र सहज बनाउने विश्वास गरिएको छ।
