प्राथमिक सेयर निष्काशन (आईपीओ) गर्ने तयारीमा रहेको श्री डिस्टिलरीको व्यापारमा उल्लेख्य वृद्धि भएको छ । कम्पनीको व्यापार सन् २०२५ को तुलनामा सन् २०२६ मा ३२ प्रतिशतले बढेको हो ।
कम्पनीले सन् २०२५ मा २३ करोड ५० लाख रुपैयाँको व्यापार गरेकोमा सन् २०२६ मा ३१ करोड ३० लाख रुपैयाँको कारोबार गरेको छ ।
हवाई तथा मिडिया उद्यमी क्याप्टेन रामेश्वर थापाको स्वामित्वमा रहेको श्री डिस्टिलरी सन् १९८६ मा स्थापना भएको हो । कम्पनी सन् २०२२ मा पब्लिक कम्पनीमा परिणत भएको थियो । सन् २०२१ मा व्यवस्थापन परिवर्तन भएपछि कम्पनीले कारोबार विस्तार र बजारीकरणमा विशेष जोड दिँदै आएको छ ।
कम्पनीले डिस्टिलरी तथा स्पिरिट उत्पादनका लागि इजाजत लिएको छ । यसको वार्षिक ९ लाख केस मदिरा उत्पादन गर्ने क्षमता रहेको छ । कम्पनीले ७० युपी, ५० युपी र ४० युपी सेग्मेन्टका मदिरा उत्पादन गर्दै आएको छ । जोस पियोर एन्ड स्मुथ ह्वीस्की, सगुन एप्पल ह्वीस्की, सगुन गोल्ड ह्वीस्की, सगुन ग्रिन एप्पल ह्वीस्की तथा ओयसिस अल्ट्रा प्रिमियम भोड्का कम्पनीका प्रमुख उत्पादन हुन् ।
कम्पनीका अनुसार गत आवमा ओयसिस भोड्का बजारमा ल्याएपछि कारोबार बढेको हो । उक्त उत्पादनले गत आवको कुल व्यापारमा करिब २० प्रतिशत योगदान गरेको छ । कम्पनीले गत आवमा ३.७३ प्रतिशत खुद नाफा कमाएको छ, जुन सन् २०२५ को ०.३६ प्रतिशतको तुलनामा उल्लेख्य सुधार हो । कम्पनीको ग्रस क्यास एक्रुअल २ करोड ५० लाख रुपैयाँ पुगेको छ ।
माउन्ट एभरेष्ट र गोर्खाली रमजस्ता ट्रेडमार्क तथा ब्रान्डको बलियो उपस्थितिले बजार विस्तारमा सहयोग पुगेको कम्पनीको भनाइ छ । कम्पनीले थप ८ हजार किलोलिटर स्पिरिट उत्पादनका लागि समेत इजाजत लिएको छ ।
हाल कम्पनीले ७० युपीको मदिरा र ४० युपीको ओयसिस भोड्काको उत्पादनमा जोड दिएको छ । साथै, ३० युपी र २५ युपी सेग्मेन्टको माउन्ट एभरेष्ट ब्रान्डलाई विविधीकरण गर्ने योजना कम्पनीले अघि सारेको छ । आईपीओ निष्काशनको तयारीसँगै बढ्दो कारोबार र उत्पादन विस्तारले कम्पनीको बजार उपस्थितिलाई थप बलियो बनाउने अपेक्षा गरिएको छ ।
