पथलैंया–वीरगन्ज औद्योगिक कोरिडोरका डेडिकेटेड तथा ट्रंकलाइनको विद्युत महसुल तिर्न बाँकी रहेकोे तीन ठूला उद्योगले किस्ता तिरेर नियमित उत्पादन थालेका छन् । हुलास स्टिल इण्डष्ट्रिज, अशोक स्टिल, हामा आइरनले विद्युत महसुल किस्तामा तिर्न थालेपछि उद्योगको उत्पादन नियमित भएको छ ।
हुलास स्टिल इण्डष्ट्रिज, अशोक स्टिल, हामा आइरनले डेडिकेटेड तथा ट्रंकलाइन प्रयोगबापतको प्रिमियम महसुल किस्तामा तिर्ने प्राधिकरणसँगको सहमतिपछि पहिलो किस्ता तिरेपछि ३ ठूला उद्योगमा विद्युत नियमित भएको प्राधिकरणले जनाएको छ ।
हामा आइरन एण्ड स्टिल इन्डस्ट्रिजले डेडिकेटेड ट्रंकलाइनबापत ५ करोड ८५ लाख रुपैयाँमध्ये पहिलो किस्ताबापत २० लाख ८९ हजार रुपैयाँ बुझाएको छ । हुलास स्टिलले तिर्न बाँकी १४ करोड १२ लाख रुपैयाँलाई २८ किस्तामा तिर्ने प्राधिकरणसँग सहमति गरेको र ५० लाख ४३ हजार किस्ता तिरेको छ ।
अशोक स्टिलले बुझाउनुपर्ने बाँकी महसुल १७ करोड ५८ लाख रुपैयाँमध्ये पहिलो किस्ताबापत ६३ लाख रुपैयाँ बुझाएको प्राधिकरणका सिमरा केन्द्र प्रमुख रमेश रुपाखेतीले जानकारी गराए । जस्तापाता उत्पादनमा प्रख्यात रहेको भारतमा समेत निर्यात गर्ने हुलास स्टिलको गत आर्थिक वर्षमा ६५ हजार टन उत्पादन गरी बिक्री गरेको कम्पनीले जनाएको छ ।
जस्ता, पाइप, आल्मुनियमका झयाल, ढोका, पोललगायतका करिब एक दर्जन बढी प्रकारका उत्पादन गर्ने हुलास स्टिलमा स्थाई, करार, आपूर्तिकर्तामार्फत प्रयोग हुने श्रमिकसहित ११ सय जना कर्मचारी रहेका छन् । यो कम्पनी पनि किस्तामा महशुल तिरेर पूर्ण रुपमा संचालनमा आएको हो ।
पछिल्लो समय आफैले फलामको ब्लेड बनाई छड, पत्तिको उत्पादन र बिक्री थालेको अशोक स्टिलले बजार र बिक्री उच्च नहुँदा उत्पादन क्षमता घटाएको छ । हामा आइरनले उत्पादन गर्ने उच्च गुणस्तरको टीएमटी छड ठूला पूर्वाधार निर्माण कम्पनीको मागअनुसार उत्पादन गर्ने गरेको बारा–पर्सा औद्योगिक कोरिडोरका सभापति संजय साहले जानकारी गराए ।
भुक्तानीको विवरण निम्न अनुसार छ:उद्योगको नाम कुल बाँकी महसुल (रु.) किस्ता संख्या पहिलो किस्ता (रु.) हुलास स्टिल १४ करोड १२ लाख २८ किस्ता ५० लाख ४३ हजार अशोक स्टिल १७ करोड ५८ लाख – ६३ लाख हामा आइरन ५ करोड ८५ लाख – २० लाख ८९ हजार
