गणेश थापा । क्यालिफोर्निया, १५ अप्रिल ।
गएको २४ घण्टाको अवधिमा कोरोना भाइरसको संक्रमणबाट संयुक्त राज्य अमेरिकामा संसारकै सवैभन्दा बढी मानिस २२०० जनाको मृत्यु भएको छ । आज मात्रै यहॉ करीव २६ हजार व्यक्तिमा कोरोना संक्रमण देखिएको छ । सान फ्रान्सिस्को क्रोनिकल मिडियाबाट प्राप्त ताजा अपडेट अनुसार कोरोना भाइरसको संक्रमणबाट अमेरिकामा अहिलेसम्म २६०४१ जनाको मृत्यु भएको छ । संक्रमित संख्या विश्वमै सवैभन्दा बढी करीव ६१०००० (विश्वको कूल संख्याको ३० प्रतिशत भन्दा बढी) पुगेको छ ।
अमेरिकामा कोरोना भाइरसको संक्रमण असामान्य बन्दै गएको छ। यस बीचमा ६ जना नेपालीको मृत्यु भएको छ भने कोरोना भाइरसबाट संक्रमित हुने नेपालीहरू सयौंको संख्यामा हुनसक्ने यहाँका सामाजिक संघ संस्थाहरूले जनाएका छन् । अमेरिकाका ५० वटै राज्यमा फैलिएको कोरोनाबाट करीव २ करोड जनसंख्या रहेको न्युयोर्कमा मात्रै १०८४८ जनाको मृत्यु भएको छ । त्यहॉ दुई लाख बढी व्यक्ति संक्रमित भएका छन् । सो ठॉउमा नेपालीहरूको बाक्लो बसोबास रहेको हुँदा कोरोना भाइरसको संक्रमणका कारण त्यहॉ सवैभन्दा बढी नेपाली प्रभावित भएका छन् । यता क्यालिफोर्नियामा ७७९ जनाको मृत्यु भएको छ भने २५ हजार बढीमा संक्रमण देखिएको छ ।
अमेरिकामा कोरोना भइरसको बढ्दो संक्रमणलाई लिएर विश्व स्वास्थ्य संगठन (WHO) र संयुक्त राष्ट्रसंघले चिन्ता व्यक्त गर्दै आएका छन् । देशमा कोरोना भाइरस फैलिन नदिन पर्याप्त प्रयास नगरेको भन्ने विभिन्न क्षेत्रबाट भइरहेको आलोचना खेप्दैआएका अमेरिकी राष्ट्रपति डोनाल्ड ट्रम्पले WHO माथि गम्भिर आरोप लगाउदै आएका छन् ।
कोरोना भाइरस नियन्त्रणको प्रारम्भिक प्रयासमै असफल भएको, चीनमा भाइरसको संक्रमण फैलिरहदा त्यसलाई ढाकछोप गर्ने प्रयास गरेको लगायतका आरोप लगाउदै WHO लाई अमेरिकाकोतर्फबाट गरिदैआएको सहयोग रोक्न ट्रम्पले आफ्नो प्रशासनलाई आदेश जारी गरिसकेको बताइएको छ । यसैबीच कोभिड-१९ बाट प्रभावित आफ्ना करोडौं नागरिकलाई राहत स्वरूप बाड्न लागिरहेको हजारौं डलरको चेकमा राष्ट्रपति डोनाल्ड ट्रम्पको नाम राख्न अमेरिकाको अर्थ मन्त्रालयले आन्तरिक राजस्व सेवा (आईआरएस) लाई आदेश दिएका कारण सम्बन्धित व्यक्तिले रकम प्राप्त गर्न केही ढिलो हुने सिएनएनले जनाएको छ ।
उता दक्षिणी अमेरिकी राज्यहरू क्यारोलिना, जर्जिया, अलाबामा, लगायतका अन्य विभिन्न स्थानमा सोमवार आएको शक्तिशाली अॉधी तथा चक्रवात(टोर्नाडो) बाट तीन दर्जन बढीको ज्यान गएको छ भने सयौं भवनहरूमा क्षति पुग्नुका साथै लाखौं मानिसहरू प्रभावित भएको स्थानीय संचारमाध्यमहरूले उल्लेख गरेका छन् ।
