रसुवा, नुवाकोट, धादिङ, चितवन र गोरखाका नदी तटीय क्षेत्रमा आएको विनाशकारी बाढीमा परी मृत्यु हुनेको संख्या १ सय पुगेको छ । प्रहरीले बाढी प्रभावित विभिन्न क्षेत्रमा खोजी तथा उद्धारका क्रममा अहिलेसम्म १ सय जनाको शव फेला पारेको जनाएको छ ।
प्रहरी प्रवक्ता डीआईजी अबि नारायण काफ्लेका अनुसार रसुवास्थित भोटेकोशी नदीमा आएको भीषण बाढीपछि नदीको बहावले बगाएर ल्याएका शवहरू विभिन्न जिल्लाका नदी तटीय क्षेत्रमा फेला परेका हुन् । फेला परेका शवमध्ये कतिपयको पहिचान खुल्न बाँकी रहेको र आफन्त तथा सम्बन्धित निकायको सहयोगमा पहिचानको प्रयास भइरहेको उनले जानकारी दिए ।
बुधबार बिहान करिब ९ बजेतिर चीनको तिब्बततर्फबाट आएको ल्हेन्दे खोलाको बाढी रसुवाको भोटेकोशी नदीमा मिसिएपछि बाढीले विकराल रूप लिएको थियो । अचानक आएको ठूलो बाढीका कारण नदी आसपासका बस्ती, सडक, पुल तथा विभिन्न भौतिक संरचनामा ठूलो क्षति पुगेको छ । बाढीले जनजीवन अस्तव्यस्त बनाएपछि प्रभावित क्षेत्रमा सुरक्षाकर्मीलाई उद्धार तथा राहत कार्यमा परिचालन गरिएको छ ।
बाढीमा परी २८ जना प्रहरी कर्मचारीसमेत सम्पर्कविहीन रहेको प्रहरीले जनाएको छ । रसुवाको टिमुरे र मैलुङ क्षेत्रमा कार्यरत सशस्त्र प्रहरीका केही कर्मचारी पनि बाढीपछि सम्पर्कमा नआएको बताइएको छ । उनीहरूको खोजीका लागि सुरक्षाकर्मीले सम्भावित स्थानहरूमा खोज तथा उद्धार अभियान तीव्र बनाएका छन् ।
बाढी प्रभावित क्षेत्रमा नेपाली सेना, नेपाल प्रहरी र सशस्त्र प्रहरी बलका टोलीहरू परिचालन भएका छन् । सुरक्षाकर्मीहरूले बाढीमा फसेका तथा जोखिममा रहेका नागरिकलाई सुरक्षित स्थानमा स्थानान्तरण गर्नुका साथै नदी किनार र प्रभावित बस्तीमा खोजी अभियान सञ्चालन गरिरहेका छन् । उद्धारका क्रममा घर तथा संरचनामा फसेका मानिसलाई सुरक्षित स्थानमा ल्याइएको छ भने जोखिममा रहेका परिवारलाई अन्यत्र सार्ने कामसमेत भइरहेको छ ।
अचानक आएको बाढीका कारण कतिपय स्थानमा सडक तथा पुलमा क्षति पुगेपछि प्रभावित क्षेत्रमा आवतजावतसमेत कठिन बनेको छ । केही बस्तीमा सञ्चार तथा यातायात सम्पर्क प्रभावित भएकाले उद्धार र राहत सामग्री पुर्याउन चुनौती देखिएको छ । नदीको बहाव अझै जोखिमपूर्ण रहेकाले नदी किनार तथा जोखिमयुक्त क्षेत्रमा रहेका नागरिकलाई सतर्क रहन र सुरक्षित स्थानमा जान सुरक्षाकर्मी तथा स्थानीय प्रशासनले आग्रह गरेका छन् ।
प्रशासनले बाढीबाट प्रभावित नागरिकको विवरण संकलन, बेपत्ताको खोजी, मृतकको पहिचान तथा उद्धार गरिएका व्यक्तिको व्यवस्थापनलाई प्राथमिकतामा राखेको जनाएको छ । साथै, बाढीबाट क्षतिग्रस्त सडक, पुल, विद्युत् तथा अन्य पूर्वाधारको अवस्थाबारे पनि सम्बन्धित निकायले विवरण संकलन गरिरहेको छ ।
बाढीमा ज्यान गुमाउनेको संख्या बढ्न सक्ने आशंका गरिएको छ । नदीको बहावले शव तथा भग्नावशेषहरू तल्लो तटीय क्षेत्रमा पुर्याएकाले रसुवासहित नुवाकोट, धादिङ, चितवन र गोरखाका नदी आसपासका क्षेत्रमा समेत खोजी अभियानलाई विस्तार गरिएको छ । उद्धार तथा खोजी कार्य जारी रहेकाले बेपत्ता नागरिक र सुरक्षाकर्मीको अवस्थाबारे थप विवरण आउने प्रहरीले जनाएको छ ।
