सन् २००० मा स्थापना भएको हिमालयन बुलियन कम्पनी नेपालको चाँदीको बुलियन बजारमा एक्लो संगठित सहभागी हो। दुबई र हङकङबाट शुद्ध चाँदी आयात गरी ग्रान्यूल्समार्फत बुलियन र सिक्काको रूपमा कारोबार गर्ने यो कम्पनीले ९९.९९ प्रतिशत शुद्धताको प्रमाणपत्रसहितका उत्पादनहरू बजारमा ल्याउने गरेको छ।
भीष्म गौतमको दुई दशकभन्दा बढीको व्यावसायिक अनुभव र सुमन गौतमको लगानी व्यवस्थापनको कुशल नेतृत्वमा सञ्चालित यस कम्पनीले नेपाली बुलियन बजारमा एक भरपर्दो र अग्रणी पहिचान बनाउन सफल भएको छ। विश्वबजारमा चाँदीको उच्च मूल्य वृद्धि र लगानीका रूपमा बढेको मागका कारण कम्पनीको व्यापारमा अभूतपूर्व प्रगति देखिएको छ।
गत आर्थिक वर्षको ९ महिनाको अवधिमा मात्रै कम्पनीले पौने १० अर्ब अर्थात् ९ अर्ब ७८ करोड ९० लाख रुपैयाँ बराबरको चाँदीको कारोबार गरेको छ। यो आँकडा सन् २०२५ मा ३० करोड २० लाख रुपैयाँ र सन् २०२४ मा ४७ करोड ४० लाख रुपैयाँ रहेको कारोबारको तुलनामा निकै ठूलो छलाङ हो, जसले कम्पनीको बजार विस्तार र व्यापारिक क्षमतालाई स्पष्ट पार्छ।
व्यापारको आकारसँगै कम्पनीको नाफा र वित्तीय परिसूचकहरूमा पनि उल्लेख्य सुधार आएको छ। गत आवको ९ महिनामा कुल व्यापारमध्ये सञ्चालन नाफा ५.६४ प्रतिशत पुगेको छ भने खुद नाफा र डिप्रिसियसनको योग (ग्रस क्यास अक्रुअल) बढेर ५० करोड ५० लाख रुपैयाँ पुगेको छ। यस अवधिमा कर्जाको वार्षिक ब्याजभन्दा सञ्चालन नाफा ६०.६९ गुणा बढी रहेको छ, जसले कम्पनीको उच्च नाफा कमाउने क्षमता र बलियो आयतर्धायक शक्तिलाई उजागर गर्दछ।
कम्पनीले आफ्नो पुँजीगत संरचना र ऋण व्यवस्थापनमा पनि उल्लेखनीय सुदृढीकरण हासिल गरेको छ। लगानीकर्ता थपिएसँगै कम्पनीको इक्विटी ३० करोड ७० लाख रुपैयाँ पुगेको छ भने समग्र गियरिङ अनुपात घटेर ०.४८ गुणामा झरेको छ, जसको अर्थ कम्पनीको कुल कर्जा स्वपुँजीको आधाभन्दा पनि कम छ। साथै, ऋण र ग्रस क्यास एक्रुअलको अनुपातमा आएको भारी सुधार तथा ग्राहकबाट इन्भेन्टरीको २५ प्रतिशत अग्रिम रकम लिने नीतिले कम्पनीको चालूपुँजी व्यवस्थापनलाई थप सुरक्षित र प्रभावकारी बनाएको छ।
यी तमाम सकारात्मक वित्तीय तथ्याङ्क र सबल व्यवस्थापनकै आधारमा केयर रेटिङ्स नेपालले हिमालयन बुलियनलाई ‘डबल बीप्लस’ इस्युअर रेटिङ प्रदान गरेको छ। कम्पनीको यो उदीयमान वित्तीय स्वास्थ्य, कम वित्तीय जोखिम र बजारको एकाधिकारले यसलाई नेपालको बुलियन क्षेत्रमा एक असाध्यै मजबुत र सुरक्षित लगानी तथा व्यावसायिक गन्तव्यको रूपमा स्थापित गरेको छ।
