आज किराँत राई समुदायको उँभौली पर्वः घर भित्रै बसेर पूजा आराधना गरेर मनाइँदै

काठमाडौं, २५ वैशाख ।
प्रत्येक वर्ष किराँत राई समुदायले मनाउने उँभौली पर्व आज देशभर पूजा आराधना गरी मनाइँदै छ । बाली लगाउनुअघि गाउँगाउँमा रहेका भूमेस्थानमा राम्रोसँग काम होस् भनी प्रकृतिको पूजा आराधना गरिने यो परम्परा मनाउँने गरिएको छ ।
गर्मी बढ्ने भएकाले यो समुदायका मानिस बेँसीबाट लेकतिर उँभो लाग्ने भएकाले पनि यसको नाम उँभौली रहेको हो । वैशाख शुक्ल पूर्णिमादेखि चराचुरुङ्गीलगायत जङ्गली जनावर पनि उँभो लाग्ने किराँत समुदायको विश्वास छ । नदीमा माछा पनि गर्मीबाट बच्न बेँसीको नदीबाट लेकतिर लाग्छन् भन्ने भनाइ छ ।
यस पर्वका अवसरमा एक आपसमा मिलेर चण्डी नाचसमेत नाच्ने गरेकोमा यो बर्ष कोरोना संक्रमणका कारण घर भित्रै बसेर पूजापाठ गरेर मनाउनुको अर्को विकल्प देखिएको छैन् । केही राई समुदायका अगुवाले भने राजधानीमा ललितपुरको हात्तीवनमा रहेको साकेलास्थानमा केही मानिस जम्मा भएर पूजा आराधनाको विधि पूरा गर्ने तयारी किराँत राई यायोक्खाले गरेको छ ।