दार्चुलाको मालिकार्जुन गाउँपालिका–५ का नरेश अवस्थी महाकाली करिडोर निर्माणपछि नेपाल–भारत र चीनसँग व्यापार र रोजगारीका अवसर बढ्ने विश्वास व्यक्त गर्छन् । सुदूरपश्चिम अहिले सीमित आर्थिक गतिविधि रहेको तर करिडोरले यस क्षेत्र र मुलुककै आर्थिक विकासमा ठूलो योगदान दिने उनको भनाइ छ ।
दार्चुलाको तिङ्करदेखि कञ्चनपुरको ब्रह्मदेवसम्म नदी किनारै निर्माण हुँदै गरेको करिडोरले यातायात सहज बनाउँदै स्थानीय बस्तीहरूलाई सडक सञ्जालमा जोड्नेछ । मालिकार्जुन गाउँपालिका–५ का वडा अध्यक्ष मदन चन्दका अनुसार करिडोरले लामो दूरीको यात्रा घटाएर आर्थिक गतिविधि बढाउनेछ ।
यो सडकले कञ्चनपुर, डडेल्धुरा, बैतडी र दार्चुलालाई जोड्दै तिङ्कर त्रिदेशीय नाकासम्म पुग्नेछ । यसले धार्मिक स्थलहरू जस्तै सिद्धवैजनाथ, परशुरामधाम, त्रिपुरा सुन्दरी र मालिकार्जुन धाम लगायत पर्यटकिय गन्तव्यलाई थप प्रवर्द्धन गर्नेछ ।
महाकाली लोकमार्ग आयोजना कार्यालयका अनुसार हालसम्म २३० किलोमिटर ट्र्याक खुलेको छ भने बाँकी ५५ किलोमिटर खोल्न बाँकी छ । चालू आर्थिक वर्षमा रु ४१ करोड ५० लाख बजेट विनियोजन भएको छ । यद्यपि बजेट अभाव र प्रक्रिया जटिलताका कारण निर्माणमा ढिलाइ भइरहेको छ ।
करिडोरसँगै बनेको चार लेनको पुल र सुक्खा बन्दरगाहले सुदूरपश्चिमको आर्थिक समृद्धिमा नयाँ आयाम थप्ने अपेक्षा गरिएको छ । करिडोरले करिब एक करोड जनसंख्यालाई प्रत्यक्ष लाभ पुग्नेछ भने व्यापारिक र धार्मिक दृष्टिले पनि महत्वपूर्ण साबित हुनेछ ।
