चालू आर्थिक वर्षको ११ महिनामा वाणिज्य बैंकहरूको कर्जा प्रवाह उल्लेखनीय रूपमा बढेको देखिएको छ । नेपाल बैंकर्स संघका अनुसार, यो अवधिमा २० वाणिज्य बैंकहरूको कर्जा प्रवाह ३ खर्ब ७६ अर्ब २९ करोड रुपैयाँले बढेको छ । विशेषगरी जेठ महिनामा मात्रै ३६ अर्ब ३२ करोड रुपैयाँको कर्जा थपिएको हो ।
गत आवको असार मसान्तसम्म वाणिज्य बैंकहरूको कर्जा प्रवाह ४५ खर्ब ७० अर्ब रुपैयाँ थियो । चालू आवको जेठ मसान्तसम्म आइपुग्दा कुल कर्जा प्रवाह ४९ खर्ब ४७ अर्ब रुपैयाँ पुगेको छ, जसले ८.२३ प्रतिशतको वृद्धि देखाउँछ । तर राष्ट्र बैंकले चालू आवमा १२.५ प्रतिशत कर्जा वृद्धि हुने अनुमान गरेको थियो । अब आव सकिन एक महिना मात्र बाँकी रहँदा पनि लक्ष्य अनुसार कर्जा प्रवाह नभएको देखिन्छ ।
वाणिज्य बैंकहरू आर्थिक वर्षको अन्त्यमा कर्जा प्रवाहभन्दा असुलीमा बढी ध्यान दिन्छन् । त्यसैले असारमा कर्जा प्रवाह सुस्त हुने प्रवृत्ति यो वर्ष पनि दोहोरिएको हो । कर्जा प्रवाह लक्ष्यअनुसार नभए पनि अघिल्लो वर्षको तुलनामा भने सुधार भएको बैंकिङ क्षेत्रका विज्ञहरूले बताएका छन् । ब्याजदर घटेको भए पनि लगानीका अवसर सीमित भएका कारण बैंकमा निक्षेप थुप्रिएर बसेको अवस्था छ ।
महिना अनुसार हेर्दा कर्जा प्रवाह साउनमा २ अर्बले बढेको थियो भने भदौ र असोजमा क्रमशः ५३ अर्ब र ५६ अर्बले वृद्धि भएको थियो । कात्तिकमा भने कर्जा प्रवाह २ अर्बले घटेको थियो । मंसिरमा ४२ अर्ब, पुसमा ९४ अर्ब, माघमा १२ अर्ब, फागुनमा २३ अर्ब र चैतमा ६५ अर्बले कर्जा प्रवाह बढेको थियो । वैशाखमा भने ४ अर्बले घटेको कर्जा प्रवाह जेठमा फेरि ३६ अर्बले बढेको हो ।
यसैबीच समीक्षाधीन अवधिमा बैंकहरूको निक्षेप संकलन पनि उल्लेखनीय रूपमा बढेको छ । ११ महिनामा वाणिज्य बैंकहरूको निक्षेप पाँच खर्ब ३ अर्ब रुपैयाँले वृद्धि भई ६२ खर्ब ५८ अर्ब रुपैयाँ पुगेको छ । गत आवको अन्त्यसम्म यो रकम ५७ खर्ब ५४ अर्ब रुपैयाँ थियो । यसले ८.७५ प्रतिशतको वृद्धि देखाउँछ ।
बढ्दो रेमिट्यान्स आप्रवाह र आर्थिक वर्षको अन्त्यतर्फ सरकारको खर्च विस्तारले पनि बैंकमा निक्षेप बढाएको देखिन्छ । विशेष गरी जेठ महिनामा मात्रै एक खर्ब १५ अर्ब रुपैयाँ निक्षेप थपिएको छ । साउनमा ३९ अर्बले घटेको निक्षेप भदौ र असोजमा क्रमशः ७३ अर्ब र १ खर्ब ३३ अर्बले बढेको थियो । कात्तिकमा १९ अर्बले घटेको निक्षेप त्यसपछि मंसिरदेखि जेठसम्म निरन्तर रूपमा बढ्दै गएको छ ।
