अर्घाखाँची सिमेन्टले आर्थिक वर्ष २०२४/२५ को पहिलो नौ महिनामा ३ अर्ब ९६ करोड ७० लाख रुपैयाँको व्यापार गरेको छ। यो जानकारी क्रेडिट रेटिङ एजेन्सी इक्रा नेपालले गरेको रेटिङबाट बाहिर आएको हो। कम्पनीले ४ अर्ब ३५ करोड ७० लाख रुपैयाँको बैंकिङ कर्जाका लागि रेटिङ गराएको थियो।
पछिल्ला वर्षहरूको कारोबार हेर्दा, सन् २०२४ मा ६ अर्ब ६ करोड ६० लाख, २०२३ मा ५ अर्ब ७७ करोड २० लाख, २०२२ मा ७ अर्ब ५८ करोड ९० लाख, र सन् २०२१ मा ८ अर्ब ७० करोड ४० लाख रुपैयाँ बराबरको कारोबार गरेको थियो। हालको आर्थिक मन्दीका कारण निर्माण कार्यमा आएको सुस्ती र सिमेन्ट उद्योगहरूबीचको अस्वस्थ प्रतिस्पर्धाले गर्दा विगतको तुलनामा व्यापार घटेको देखिन्छ।
अर्घाखाँची सिमेन्ट सिद्धार्थ ग्रुप, केडिया अर्गनाइजेसन, र मुरारका समूहजस्ता अनुभवी व्यावसायिक घरानाहरूद्वारा सञ्चालित छ। यस उद्योगका सञ्चालकहरूलाई निर्माण, व्यापार, बैंकिङ, बिमा, लगायतका क्षेत्रमा लामो अनुभव छ।
कम्पनीको सेयर संरचनामा सिद्धार्थ ग्रुपको ३५%, मुरारका ग्रुपको ३०%, केडिया अर्गनाइजेसनको १७.५%, र भारतीय सिमेन्ट उद्योग उम्मा सिमेन्ट इन्टरनेसनलको १७.५% सेयर स्वामित्व रहेको छ। अर्घाखाँची सिमेन्टले वार्षिक १ मिलियन टन क्लिंकर र सिमेन्ट उत्पादन तथा बिक्री गर्दै आएको छ।
