अघिल्लो आर्थिक वर्षको तुलनामा २०८१/८२ मा व्यावसायिक ईभीको आयात ७३ प्रतिशतले बढेको छ । भन्सार विभागको तथ्याङ्कअनुसार एक वर्षमा ९ अर्ब ४८ करोड रुपैयाँ बराबरको तीन हजार १३२ युनिट विद्युतीय माइक्रोबस र बस आयात भएको छ ।
सरकारले दुई अर्ब १० करोड रुपैयाँ बराबरको राजस्व संकलन गरेको छ । तर अघिल्लो आर्थिक वर्ष २०८०/८१ मा तीन अर्ब ९५ करोड रुपैयाँ बराबरको एक हजार ३३० युनिट व्यावसायिक ईभी आयात हुँदा सरकारले ९६ करोड ३४ लाख रुपैयाँ बराबरको राजस्व संकलन गरेको थियो ।
गत वर्ष ११ अर्ब ६ करोड रुपैयाँ बराबरका ३ हजार ८१३ युनिट व्यावसायिक ईभी आयात भएका छन् । यसबाट सरकारले २ अर्ब ७३ करोड रुपैयाँ राजस्व सङ्कलन गरेको छ । अघिल्लो वर्ष १ हजार ५ युनिट व्यावसायिक ईभी आयात गरिएको थियो ।
त्यस्तै, बाइक र स्कुटर गत आर्थिक वर्षमा २४ अर्ब ५० करोड रुपैयाँ बराबरका २ लाख १ हजार युनिट बाइक र स्कुटर आयात गरिएको छ । यसबाट सरकारले २४ अर्ब ७३ करोड रुपैयाँ राजस्व सङ्कलन गरेको छ । अघिल्लो वर्ष १ लाख ३४ हजार ५५६ युनिट बाइक र स्कुटर आयात गरिएको थियो ।
इन्धन प्यासेन्जर गाडीको आयात पनि बढेको देखिएको छ । गत आर्थिक वर्ष ६ अर्ब ९३ करोड रुपैयाँ बराबरका ४ हजार ९७८ युनिट इन्धन प्यासेन्जर गाडी आयात भएका छन् । यसबाट सरकारले १६ अर्ब ७५ करोड रुपैयाँ राजस्व सङ्कलन गरेको छ । अघिल्लो वर्ष ४ हजार २४६ युनिट इन्धन प्यासेन्जर गाडी आयात भएका थिए ।
