भारतीय सांगीतिक क्षेत्रकी नक्षत्र, प्रसिद्ध गायिका आशा भोसलेको निधन भएको छ। मुम्बईको एक अस्पतालमा उपचारका क्रममा उनको प्राणपखेरु उडेको भारतीय सञ्चारमाध्यमहरूले पुष्टि गरेका छन्।
शनिबार हृदयाघात (कार्डियाक अरेस्ट) भएपछि उनलाई आकस्मिक रूपमा अस्पताल भर्ना गरिएको थियो। उनको यो असामयिक बिदाइले विश्वभरका संगीत प्रेमीहरूलाई स्तब्ध बनाएको छ। शास्त्रीय संगीतका ज्ञाता दीनानाथ मंगेशकरकी पुत्री आशाको सांगीतिक यात्रा बाल्यकालमै सुरु भएको थियो। घरभित्रको सांगीतिक माहोलले उनलाई र दिदी लता मंगेशकरलाई गायनमा लाग्न प्रेरित गरे पनि आशाका लागि आफ्नो छुट्टै पहिचान बनाउनु निकै चुनौतीपूर्ण थियो।
दिदी लताको विशाल उचाइ र प्रभावको छायाबाट बाहिर निस्केर आफ्नै मौलिक स्वर र शैली स्थापित गर्न उनले जीवनको लामो कालखण्ड संघर्षमा बिताइन्। अन्ततः आफ्नो अद्वितीय गायकीमार्फत भारतीय संगीतमा एउटा बेग्लै युगको सुरुवात गरेकी आशाको अवसानसँगै एउटा स्वर्णिम अध्यायको अन्त्य भएको छ।
